Willemstad – Direktiva, gerente, trahadónan i boluntarionan a bin ta hasi trabounan duru e último dos aña pa rebibá e parke ku nos tur konosé komo ‘dierentuin’ bek. E reto di mas grandi pa e fundashon ta e rekursonan finansiero limitá ku e disponé di dje. Na diferente okashon direktiva di e parke a duna di konosé ku e supsidio mensual di gobièrnu ta realmente apresiá pero ku e no ta sufisiente pa kubri tur e obligashonnan finansiero. E buraku ta keda bira kada bes mas grandi. Pa por drai e parke di forma responsabel mester di mínimo 40 mil florin i e ta risibiendo aktualmente 18 mil florin. Relatonan finansiero ta demostrá esaki i ta habri pa un i tur tira un bista riba dje. Fundashon a tuma nota den media ku minister a aprobá un supsidio adishonal, ku mester a bin den 2013, di 150 mil florin. Te ainda e montante aki no a subi kuenta di e fundashon. Fundashon ta agradesido na gobièrnu ku despues di hopi súplika a duna oido i gobièrnu a duna un èkstra di 2013. Mirando e défisit mensual ku fundashon tin,  e èkstra di 150 mil florin naturalmente ta yuda, pero ta un solushon temporal. Mester sinta i fiha un solushon struktural pa largu tempu pa e buraku, finansiero ku e fundashon a bin ta akumulá, no sigui krese. Pa aña 2014 basa riba e presupuesto di fundashon, ku a keda entrega i ku e montante aprobá di supsidio di gobièrnu, e buraku lo sigui krese. Diferente ta e dokumentonan kaminda e fundashon a plantia esaki na Zorginkoop i na e minister.

Medidanan di ahuste finansiero

A konsekuensia di e problema finansiero ku gobièrnu mes ta enkontra, gobièrnu a tuma e desishon pa di un forma struktural sigui baha e supsidio ku fundashon ta risibí. Fundashon na su turno a haña su mes obligá di tuma medidanan di ahuste finansiero ku ta nifiká ku mester subi entrada i baha gastu. Durante di aña 2013 Fundashon Parke Tropikal a hasi lo máksimo pa tene su kabes riba awa. A konsekuensia di esaki den desèmber 2013 fundashon a informá tur personal den un seshon kiko ta e situashon finansiero i kiko ta e medidanan ku nan por spera pa aña 2014. A yega asina leu ku djaluna dia 20 di yanüari Fundashon Parke Tropikal  a start proseso pa pidi pèrmit di retiro di 3 empleado. Direktiva di fundashon ta lamentá ku mester yega na e situashon ferfelu aki pero no a keda e fundashon nada otro paso e situashon finansiero ta keda un delikado. Djaweps awor dia 23 di yanüari direktiva ta sinta ku representante di PWFC pa yega na un akuerdo satisfaktorio pa tur partido. Naturalmente fundashon ta sòru, teniendo kuenta ku e situashon finansiero prekario i ku e espasio finansiero ku gobièrnu lo duna e fundashon, pa e trahadónan haña tur e benefisionan ku ta korespondé na nan segun lei.

Donashon i plan maestro

Apesar di tur e medidanan ferfelu aki e fundashon ta keda positivo i ta sigui traha na adelanto di e parke i tur esnan envolví. Delaster tempu e fundashon ta hañando donashon di diferente kompania den forma di material i trabou boluntario. Un ehemplo di esaki ta donashon di por ehèmpel Jansen de Jong, Apache Heavy Equipment i Operashon Street Legal ku ta kontribuí na infrastruktura di e parke. E supsidio di gobièrnu no ta kubri e gastu grandi di infrastruktura aki. Tin un plan maestro di desaroyo di e parke ku ta una beyesa pero ta ku koperashon di un i tur por logra esaki. Persona, instansia i kompanianan ta hañando konfiansa den e plan i maneho di e parke i ta kontribuí den diferente forma manera donashon di trabou boluntario, material i konseho. Resientemente a lanta Stichting Vrienden van de Dierentuin ku ta enkargá pa buska fondo finansiero pa e parke den forma di un kampaña di donashon.

Diferente bishita lokal i internashonal

E bishita di e konosido Jack Hanna na Korsou a duna un impulso positivo na e esfuersonan i maneho ku e parke a bin ta hiba te ku awor. E tabata asina entusiasmá ku e produkto úniko ku Korsou tin di ofresé ku den mart un delegashon chikí riba invitashon i gastu di Jack Hanna ta bai di bishita na Columbus Zoo na Ohio pa haña mas konseho i guia kon pa sigui desaroyá i manehá Parke Tropikal. Ta estrechando lasonan di trabou i koperashon ku otro parkenan di bestia den region manera Aruba, Sint Maarten, Sürnam i Miami. Lokalmente ta diferente parlamentario i polítikonan ku a pasa durante di e 2 aña aki pa informá nan mes di e situashon pero nada konkreto te ainda no a bin afó. Fundashon Parke Tropikal ta di opinion ku di parti di gobièrnu te ainda e fundashon no ta hañando e sosten  i oido ku e fundashon lo a deseá, pa trese e kambionan struktural den parke i pa ehekutá tur e plannan ku e fundashon tin. Sinembargo ta spera ku esaki lo kambia den futuro serkano.

Solushon struktural

Konhuntamente ku gobièrnu mester sinta pa regla e situashon finansiero di e parke, di forma struktural. Si esaki no sosodé no por ekskluí ku e parke por sera su portanan den futuro serkano. Esaki ta algu sigur di lamentá mirando tur esfuersonan ku a bin ta hasi pa su adelanto i e konfiansa di donatenan ku a bin ta krese i aportá durante último añanan. Fundashon ta yama danki na un i tur ku te ainda a duna nan sosten sea finansiero òf den material i ta spera ku den 2014 Fundashon Parke Tropikal lo haña mas hende, instansia i kompanianan pa duna un aporte na e proseso positivo di kambio aki.