WILLEMSTAD- HOPE Softball Tournament 2016 ta bai ranka sali. Nos di ACZHON, e asosashon di personal di Stichting Overheidsaccountantsbureau (SOAB) for di aña 2014 a tuma over e organisashon di e prestigioso torneo di sòfbòl komersial i sosial di slowpitch “HOPE”  ku ta pará pa “Helping Others Persevere & Excel”. HOPE ta e konsepto ku a wòrdu inisiá dor di Stichting Belasting Accountants Bureau (SBAB) i a kontinuá bou di direkshon di KOMPA, e komishon pa atletanan di Maduro & Curiels Bank N.V.

Mas o menos 50 instansia i kompaníanan di Kòrsou tur aña di nobo ta inskribí pa partisipá na e torneo aki. E aña aki tampoko no tabata un eksepshon. Banda ku partisipando na HOPE trahadonan ta wòrdu stimulá pa ta aktivo deportivamente pafó di e esfera di trabou, e instansia i kompanía nan aki ta yuda rekoudá fondo tambe di e forma aki pa hinka bèk den komunidat. E aña aki tin 55 instansia di Kòrsou di kual 77 tim ta partisipando na HOPE 2016. Di e forma aki nos ta kibra nos mes rèkort di tantu kompaníanan i timnan partisipante na HOPE.

Esakinan ta kompetí den e gategoríanan sosial femenino i sosial maskulino, maskulino challenger i maskulino/femenino kombiná. Weganan ta kuminsá djabièrnè 18 Mart próksimo i lo terminá dia 24 Aprel 2016. Weganan ta tuma lugá riba djabièrnè, djasabra i djadumingu na SUVEK Ballpark.

Pero sin yudansa di otronan lo no ta posibel realisá un torneo di e magnitut aki i tambe realisá e meta ku e torneo aki tin ku ta rekoudá fondo pa hinka bèk den komunidat. Pues ku orguyo nos por informá bo(so) ku nos tin e aña aki un biaha mas SOAB i HEINEKEN komo partner den e torneo ku kual nos kier sigui hiba HOPE na un nivel mas haltu. Nos ta hopi kontentu di por partisipá ku kontinuashon di HOPE ta garantisá.  Denter di poko nos lo anunsiá kua ta e kompanía ku lo soru pa e konsepto aki keda bibu i ku lo kontinuá ku e organisashon di HOPE entrante 2017.

E fondonan rekoudá e aña aki ta bai pa stimulá hasimentu di deporte bou di diferente organisashon ku ta traha ku muchanan ku difikultat pa siña. Manera semper tabata e kaso un dushi ambiente i un bar i kushina bon surtí durante e weganan di e torneo aki ta garantisá. Pa mas informashon por tuma kontakto ku Junice Augusta òf  Darby Suriel na telefon 466-9000.