WILLEMSTAD- HOPE Softball Tournament 2014 ta bai ranka sali. Nos di ACZHON, e asosashon di personal di Stichting Overheidsaccountantsbureau (SOAB) for di e aña aki a tuma over e organisashon di e prestigioso torneo di sòfbòl komersial i sosial di slowpitch “HOPE”  ku ta pará pa “Helping Others Persevere & Excel”. HOPE ta un konsepto ku a wòrdu inisiá dor di Stichting Belasting Accountants Bureau (SBAB) i a kontinuá bou di direkshon di KOMPA, e asosashon di personal di Maduro & Curiels Bank N.V. durante e 3 ultimo añanan. Mas ku 50 instansia i kompaníanan di Kòrsou tur aña di nobo ta inskribí pa partisipá na e torneo aki. E aña aki no tabata un eksepshon. Banda ku partisipando na HOPE trahadonan ta wòrdu stimulá pa ta aktivo deportivamente pafó di e esfera di trabou, e instansia i kompanía nan aki ta yuda rekoudá fondo tambe di e forma aki pa hinka bèk den komunidat. E aña aki tin 51 instansia di Kòrsou di kual 63 tim ta partisipando na HOPE. Kompetiendo den gategoríanan sosial femenino i sosial maskulino, maskulino challenger i super challenger maskulino. Weganan ta kuminsá djabièrnè 14 Mart próksimo i lo terminá dia 27 Aprel 2014. Weganan ta tuma lugá riba djaweps, djabièrnè, djasabra i djadumingu na SUVEK Ballpark. Apertura ofisial ta tuma lugá djasabra 15 Mart di 18:00u – 19:00u tambe na SUVEK Ballpark. Komo muestra di apresio i gratitut pa e konfiansa duná na nos di SOAB pa kontinuá ku HOPE, lo tin despues di e apertura un wega amistoso entre e tim di hende hòmber sosial di SOAB i MCB. Pero sin yudansa di otronan lo no ta posibel realisá un torneo di e magnitut aki i tambe realisá e meta ku e torneo aki tin ku ta rekoudá fondo pa hinka bèk den komunidat. Pues ku orguyo nos por informá bo(so) ku nos tin e aña aki HEINEKEN komo partner den e torneo aki ku kual nos kier bai hiba HOPE na un nivel mas haltu. Banda di HEINEKEN nos tin tambe algun otro instansia ku nos lo no kier keda sin menshoná ku tambe a koperá ku nos en grande: Drukkerij Martina, Kooyman & Licores Maduro. Entretantu nos a hasi eskoho tambe di un instansia na kual nos fondonan rekoudá lo bai. Un instansia pa kual nos lo bai formalisá un proyekto konkreto. Esaki despues di un analisis hasí entre 3 instansia. Nos lo bai kontrobuí ku un medio di transporte pa Fundashon Amigunan di Cristo na Fuik. Un naschoolseopvang pa e muchanan ku nesesidatnan bastante haltu den bisindario di Fuik. Nos lo garantisá manera semper tabata e kaso un dushi ambiente i un bar i kushina bon surtí durante e weganan di e torneo aki.