WILLEMSTAD- Djadumingu 27 Aprel último  HOPE Softball Tournament 2014 a konosé un tremendo klousura. Un  SUVEK yená ku fanátikonan ku tabatin e oportunidat pa presensiá algun wega final hopi interesante i  eksitante. Weganan a kuminsá den oranan di mainta ku e final entre Selikor i SEDREKO. Den un duelo bastante ekstenso Selikor den e kategoría di challenger finalmente a logra gana SEDREKO ku un resultado di 5 pa 3. Despues di esaki a sigui den e kategoría di super challenger e final entre e timnan di SBAB i Refeneria Isla. Apesar di bon hugadanan di parti di Refeneria Isla nan no a logra gana e partido aki. Pa di tres aña konsekutivo SBAB a sabi di gana e título di kampion  di e prestigioso torneo aki ku un skor di 11 pa 7. Seguidamente a pasa pa e kategoría sosial femenino kaminda e damas nan di SBAB akinan tambe a logra yega den e final kontra di e damas nan di MCB. Un ratu a parse ku SBAB lo a bai ku e titulo aki tambe, pero MCB a logra ku un bentaha basta grandi di 5 pa 1 di vense den e partido aki. E ultimo partido kual tabata den e kategoría di sosial maskulino tabata esun mas kandente. Den e partido aki MCB i Polis a batayá kabes kabes. E publiko presente no tabata por mas ku e tenshon ku e partido aki tabata kousa. Pero finalmente Polis a sali viktorioso ku un resultado di 18 pa 17. Despues di tur esaki Dreams a sabi di entretené e públiko presente ku tabata bastante grandi. Entrega di premio tambe a tuma lugá e mesun anochi ey. Simbólikamente a hasi entrega tambe na Fundashon “Amigunan di Cristo” di un yabi di e bus na kual tur e fondonan rekoudá durante e torneo aki a bai. Esaki danki na entre otro tur ku a asistí durante 7 siman largu pa presensiá e weganan di sòfbòl slowpitch sosial i tur otro spònser nan manera Kooyman, Licores Maduro, MCB, Refineria Isla, Drukkerij Martina i XEROX. E Asosashon di Aktividatnan Soshal di SOAB, ACZHON i HEINEKEN kier gradisí tur tim nan partisipante, boluntario nan ku a yuda di un o otro forma, sin kier lubidá Chati Constancia, Gino Valerian, Ludson Clemencia, Jeffrey Martina i Radio Krioyo ku tambe tabatin un aporte grandi na e organisashon di HOPE 2014. Laga nos sigui Help Others Persevere and Excel den 2015 tambe.