ORANJESTAD, Aruba – October 2013: Como cu e aña aki e locutora, Erin Croes, ta celebra 25 aña di e programa tan gusta pa comunidad di Aruba, “Na Drempel di Fin di Aña”, Minister Michelle Hooyboer-Winklaar di Asuntonan Economico, Asuntonan Social y Cultura a entreg’e un reconocimento special. E mandatario a bisa cu e no por laga e momento special aki pasa sin mas, unda cu ya pa 25 aña caba, Erin Croes ta trece alegria, union y ambiente di fin di aña den e hogarnan na Aruba. Hopi di nos hendenan ta masha pendiente pa inicio di e programa aki, ya cu esaki ta manera un tradicion, unda cu tur su radio oyentenan ta cuminsa tambe cu e preparacionnan pa e gran celebracion di Fin di Aña. E reconocimento aki ta den forma di un obra di arte di glas, cu ta duna na den reconocimento di excelencia den radio difusion. Por sintonisa e programa “Na Drempel di Fin di Aña” na Magic FM 96.5 riba tur dialuna, diaranson y diabierna, cuminsando for di 6or te 10or di anochi, unda cu tur radio oyente por sinti y biba e ambiente dushi di Fin di Aña na Aruba.