Willemstad – E promé edishon di Curaçao Ponton Festival ta kuminsá ku un homenahe na Doña Mafalda Minguel. Riba djaweps 5 di aprel Arnell Orchestra lo duna un homenahe na e kantante legendario riba Brionplein.

Sumusica Curaçao B.V. ta organisá riba djaweps 5 di aprel un konsierto kompletamente grátis pa komunidat di Kòrsou i turistanan ku ta bishitando nos isla aktualmente. Doña Mafalda Minguel ta un íkono legendario ken ya pa 63 aña ta aktivo den e mundu di músika na Kòrsou. El a duna vários presentashonnan den eksterior manera Hulanda, Bèlgika i Merka. E orkesta bou di guia di su yu Arnell Salsbach, lo duna un homenahe na Doña Mafalda. E programashon di ‘Latin Thursday’ tambe ta konsistī di Randal Corsen Orchestra i Dolce Band. E konsierto grátis ta kuminsá 8 ‘or di anochi i kaba 11 ‘or di anochi. E públiko por disfrutá di un anochi magnífiko ku ta yená di e géneronan merengue, bolero, son, salsa, bachata i muzik karibense.

Curaçao Ponton Festival ta un festival di músika di 3 dia ku ta tuma lugá riba 5, 6 i 7 di aprel. E konsiertonan di 6 i 7 di aprel ta tuma lugá na Kleine Werf. Djabièrnè 6 di aprel ta e anochi di músika ‘urban’ i ‘hip hop’. E artistanan famoso Jeon, Hef, Ronnie Flex, Rich Kalash i Grupo Extra ta e artistanan prinsipal pa djabièrnè anochi. E klousura di e festival ta konsistí di presentashonnan musikal di un par di ganadónan di e premio Grammy. Riba djasabra 7 di aprel amantenan di reggae i rock por disfrutá di artistanan grandi manera Morgan Heritage, Bill Champlin, John Elefante, Fran Cosmo i Alex Ligertwood.