Willemstad – Dia 20 di yüli ku a pasa JCI IOBA Curaçao danki na Maduro & Curiel’s Bank i The Curaçao Zoo a organisá e lansamentu ofisial di e proyekto “Home Farming Tera Krioyo” na The Curaçao Zoo. A konta ku presensia di minister di Enseñansa, Siensia, Kultura i Deporte Sra. Irene Dick i tambe ku representante di ministerio di Salubridat Públiko, Medio Ambiente i Naturalesa Sr. Stanley Martina.

JCI IOBA Curaçao ta un organisashon boluntario ku ta traha pa trese kambio positivo den komunidat dor di ofresé personanan entre 18 pa 40 aña oportunidat di desaroyo. Pa logra e mishon aki e organisashon mester di partisipashon di henter komunidat. Y pa haña partisipashon di komunidat, e aña aki un biaha mas JCI IOBA Curaçao tin e proyekto di Home Farming Tera Krioyo. Tambe JCI IOBA Curaçao lo ta kontribuyendo na e meta number 2 i 3 di e “Sustainable Development Goals” (SDG’s) definí pa Nashonnan Uni, kual ta “Eliminá hamber rònt mundu” i “Mehorá salú i bienestar general” respektivamente.

Home Farming Tera Krioyo ta un proyekto ku JCI IOBA Curaçao lo kontinuá kuné e aña aki pa di kuater biaha. E meta prinsipal di e proyekto aki ta pa konsientisá komunidat tokante e importansha i benefisionan di planta nos propio fruta i berdura. E aña aki un biaha mas lo hasi esfuerzo pa por hiba e proyekto na skolnan tambe.

Home Farming Tera Krioyo 2016 lo kuminsá ku su kursonan durante e di 2 siman di sèptèmber. E durashon di e kurso lo ta di 7 siman i e lo ta 1 bes pa siman. E kurso lo ta yená ku temanan sumanete interesante pa empoderabo pa ta mas aktivo na bo mes kas i produsi bo mes kuminda.

Lo bai tin un total di 3 grupo, unu riba djamars, otro riba djarason i e di 3 grupo riba djasabra. Inskribí awe mes pabo no keda afo. Danki na nos partnernan Maduro & Curiel’s Bank i The Curaçao Zoo e kolaborashon lo ta solamente 25 florin. Pa mas informashon por tuma kontakto ku e komishonnan enkargá via ioba.terakrioyo@gmail.com  / 515 4608.