WILLEMSTAD —  Djarason 21 di sèptèmber  próksimo lo duna inisio na trayekto pa instalá un Konseho di Hubentut bou di enkargo di Plataforma Nashonal pa Desaroyo di Hubentut. E lansamentu lo tuma lugá den un seno ameno na Sentro di Bario Otrobanda kaminda lo fasilitá un kombersashon interaktivo estilo ‘catchbox’ entre hóbennan, polítikonan, representantenan di organisashon ku ta traha ku hóbennan.

Durante e anochi, lo splika kiko e Konseho di Hubentut ta enserá i e trayekto ku lo kana pa instalá e Konseho di Hubentut na fin di aña 2016. E Konseho di Hubentut lo konsistí di 9 hóben, ku ta ser eligí pa medio di elekshon, i ku lo tin komo tarea pa sinta na mesa ku Plataforma Nashonal pa Desaroyo di Hubentut regularmente i formula opinion i konseho riba maneho i proyektonan pa realisá un mihó desaroyo di hubentut. Alabes ta e intenshon pa e hóbennan ku lo forma e Konseho di Hubentut raportá na parlamento i Konseho di Minister riba tópikonan ku ta trata desaroyo di hubentut i traha direktamente ku diferente Minister i nan staf i otro empleadonan públiko.

Aunke ku hopi biaha aki na Kòrsou nos ta referí na e echo ku hubentut ta nos futuro, tiki biaha nos ta berdaderamente embolbí hubentut na un manera duradero den e proseso di stipulá un vishon pa futuro i na momentu di tuma desishonnan ku lo duna resultado riba termino largo. Partisipashon di hubentut den diferente area ta sumamente importante pa futuro di un país i ta empoderá hobennan pa haña akseso na informashon i ehersé nan derechi pa partisipá na prosesonan di toma di desishon ku ta afektá nan bida. Diferente institutonan di gobernashon nashonal, pero tambe lokal i regional na otro país ta instalá un konseho di hubentut.

P’esei partisipashon di hubentut tambe ta un di e pilarnan prinsipal di e Programa di Akshon pa Desaroyo di Hubentut, ku ta na enkargo di Plataforma Nashonal pa Desaroyo di Hubentut. For di e momentu ku diferente ‘stakeholders’ di gobièrnu, di organisashonnan no-gubernamental i sektor privá a bini huntu na 2015 pa traha riba e Programa di Akshon pa Desaroyo di Hubentut pa e periodo 2015-2020, a skohé pa un aserkamentu integral, inklusivo i positivo ku ta basá riba partisipashon di hóbennan. Mas ku 350 hóben a kontribuí na formula i validá e Programa di Akshon durante e Diálogo Nashonal di Hubentut. Asina nos hóbennan mes por a duna di konosé kiko nan pensamentunan, eksperenshanan i nesesidatnan ta dentro di e 5 areanan di enfoke: Enseñansa i Kuido, Salubridat i Bienestar, Trabou i Empresaría, Ambiente na Kas i di Bida i Protekshon i Seguridat.

Dor di instalá un Konseho di Hubentut, Plataforma Nashonal pa Desaroyo di Hubentut lo  ofresé un forma pa fasilitá interkambio struktural i formal entre mandatarionan i hóbennan. Durante e anochi di kontakto riba 21 di sèptèmber pa #banpapiahubentut lo kuminsa e komberashon i  interkambio entre hóbennan i invitadonan di seno politiko riba diferente tema i prioridat ku ta trata desaroyo di hubentut.

Hóbennan entre 14-24 ku ta interesá pa tei presente por inskribí via di nos website riba www.desaroyodihubentut.cw/aktividat. Si bo ta un organisashon ku ta traha ku hóbennan I bo kier mas informashon, por fabor tuma kontakto na info@desaroyodihubentut.cw