Willemstad, Curaçao –  E hóben akí, ta un ku den su forma uniko ta duna speransa na e futuro di nos pais. Unda ku e la profilá semper ela karga su pais den ekstremonan grandi. Ultimo e tabata e persona di mas hóben ku a yega di hiba un diskurso na konmemorashon di dia 30 di Mei. Gwendell Mercelina, Jr. miho konosi komo ‘WENSHOW’, un hóben, empresario sosial, artista, embahadó, un filantrofó multidisiplinario di 24 aña, a terminá komo mihó graduado di VWO i a sigui studia Lei despues di logra su “Propodeuse” a skohe e rumbo pa hasi un estudio di distansia/online “Bachelor of Arts” na Webster University Leiden ku konsentrashon riba “Media Communications”, kual e la terminá ku eksitó i aktualmente e ta den e ultimo fase komo studiante di “Marketing & International Management” na UDC. E ta konosi pa su logronan den tereno di arte i kultura, komo aktor, modelo, poeta i presentadó. I e la bira mas konosi na momentu ku ela gana e elekshon parlamentario di hóbennan na 2005 ku un rekòrt uniko di votonan risibi den historia, i despues di esaki ela bira Presidente di Hóben Goberná (Parlamentu Hubenil). Na 2009, ela ser skohe komo Hóben di Aña, i na 2010 ela fundá e konsepto internashonal “WE LEAD” ku ta un fundashon lantá pa desaroyá e ròl den nos hóbennan komo konduktornan di un nashon (nation builders) i empodera lidernan den un komunidat pa medio di diferente proyektonan. Edukando i enkurashándo hóbennan pa lucha pa ekselensia, speransa, union, pas i kambio. Pa konstruí konhuntamente un pais riba liderazgo, rèspèt pa protehá, fasilitá i provení seguridat sosial, transparensia i diversidat den union ku tur suidadano di nos pais. Den aña 2011, e plataforma mas grandi internashonal di lidernan “One Young World” a titulá e hóben aki komo embahador internashonal, sigui e mesun aña ela risibi rekonosementu gubernamental nashonal pa su trabounan sosial eherse komo esun mas hoben den nos historia. Aktualmente e hóben aki ta trahando tambe riba realisashon di su propio empresa. Apesar di a ser diagnostika den korto tempu di dos enfermedat kroniko, e kabayero aki ta sigui demostra ku den bida tin speransa, i tur kos por basta nos tin fe. Awe e lo selebra su di binti sinku aniversario den un gradisimentu i kompania di tur su sernan kerí den un bembé uniko.