Willemstad – Hospital Nobo Otrobanda (HNO) a sera un akuerdo ku nos kompania di telekomunikashon pa ta é kompania di telekomunikashon ku lo ofresé sosten i servisionan di telekomikashon na nos hòspital nobo. Servisio di telekomunikashon ta di vital importansha den un hòspital últra modèrno manera esun ku nos ta konstruyendo. HNO, den e lus aki, ta bira e promé kliente di UTS na kua nos kompania ta ofresé servisio di data ku “bandwith” di no ménos ku 10 gigabit. UTS tabata e provedor ku a presentá ku un oferta di kalidat i na un preis hustu entre tres kompanianan ku a partisipá n’e destaho ku HNO a tene. Ku e akuerdo aki, nos por ta orguyoso ku lokual keda invertí dor di HNO, ta keda sostené pa un kompania lokal, lokual ta nifiká ku e sèn ta keda aki i drenta nos ekonómia.

Servisio i sosten di UTS na HNO

Den e hòspital últra modèrno ku Kòrsou ta konstruyendo, servisio di data di spit haltu riba kua bo por konta 100% ta esenshal. UTS lo sostené e funshonnan ‘diagnostiek en analyse’ den nos hòspital nobo, kaminda tur informashon lo ta disponibel digitalmente i ‘realtime’, ku servisio di data ku bandwith di no ménos ku dos biaha 10 gigabit. Pues, den nos hòspital nobo, UTS lo bai disponé di un sistema dòbel pa garantisá ku si un konekshon kai afó, tur kos ta sigui funshoná nòrmal, netamente debí n’e dòbel konekshon aki. Lo operá henter e sistema tambe tantu for di e edifisio di HNO mes, komo for di e sentro di data di UTS na Seru Mahuma. Di e forma aki ta brinda sosten 100% konfiabel pa garantisá ku e trabounan importante den hòspital, determinante pa bida di hende, ta tuma lugá den tur trankilidat i ku konfiansa 24 ora pa dia, 7 dia pa siman durante henter aña.

Aparte di e servisio di data, e pakete ku UTS lo sostené HNO kuné ta konsistí di servisio di telefòn, servisio di televishon IP di mas modèrno, servisio di “wifi seamless roaming” rònt hòspital pa diagnostiká i analisá informashonnan médiko. Esaki ta un bon muesta kon UTS i su kompanianan a kombiná esfuerso pa brinda solushon na midí pa un kliente importante manera HNO.

Sosten optimal na HNO pa ta kla ora habri hòspital

E trabounan preparativo pa tin e sosten i servisionan na lugá ora ku e hòspital nobo habri ya ta kanando. UTS ya kaba a kuminsá konektá servisionan di internèt i ta sosteniendo diferente ekipo i funshonalidatnan ku ta konta ku e konekshon di data di spit haltu. Por bisa ku entrenamentunan di e personal di HNO, usando e infrastuktura di UTS, ta tumando lugá den e “House of Change” di HNO. Durante e pròksimo 9 lunanan lo hasi tur sobrá trabounan preparatorio i tèstnan nesesario pa na momentu ku nos hòspital últra modèrno habri, tur kos ta 100% na lugá i ta funshonando optimalmente.