Sigur e sorpresa pa e anochi di premiashon pa ku Karnaval su Gran Marcha, tabata e grupo ku pa e aña aki a debutá den nos Karnaval, pero ku a sa di trese hopi inovashon i a sa di bai ku nada mas ku 6 premio riba e anochi aki.

Kòrsou por ta hopi orguyoso pa loke ta e presentashon di nos gruponan den nos Gran Marcha 2019, pa loke ta kalidat, fantasia, arte i no papia mes di ambiente huntu ku nos bandanan musikal i Dj’s nan a trese.

Grupo Hats off to Dreams a bai ku e siguiente premionan: Premio Fantasia General, Premio Roadpiece di Aña, Grupo Mas Impaktante, Mihó Bar, Mihó Akabá. Premio Historia Nashonal Mundial a bai pa, Grupo Entrenous, Folklor Internashonal i Premio Mas Ambiente, Grupo Estreno di Pikete, Mihó Karosa, Grupo Dushi Aventura, Individual Gran Marcha 2019, John John.

UTS tambe tabata tin un kampana kaminda ku pueblo por a vota pa nan grupo favorito, kaminda ku a saka un ganadó for di esnan ku a vota i a risibí un suma di fl. 2.500,– i e grupo ku a resultá ganadó a haña un check na balor di fl.10.000,– ku a bai pa Grupo Vise Versa.

Komo premiashon di Grupo di Aña 2019, Segundo Finalista, Estreno di Pikete, Promé Finalista, Grupo Dushi Aventura i komo e Grupo di Aña pa Gran Marcha 2019, Grupo Hats off to Dreams.  E grupo a risibí for di man di sra. Ellen, e representante di  EXTURA, El Tributo i Entiero na Kuota un chek na balor di fl.15.000,–. Sr. Juni Aniceta na nòmber di Direktiva di Fundashon JAG a deseá tur grupo pabien pa ku nan logro i pa nos ban kuminsá traha for di awor pa selebrashon Karnaval 50 aña.