WILLEMSTAD- Ministerio di Desaroyo Ekonómiko kier rekordá tur persona ku kier bende produkto riba ruta di karnaval 2018 ku pa hasi esaki bo mester ta dispone di un pèrmit temporal pa benta ambulante(ventvergunning) òf un pèrmit pa bende kos for di un puesto (standplaatsvergunning) bálido.

For di 4 di desèmber último tur persona ku ta kumpli ku tur e rekisitonan preskribí i ku kier bende algu riba ruta di karnaval 2018 por hasi petishon pa un pèrmit temporal. Pa entregá un petishon mester tin tur e siguiente rekisitonan na òrdu promé;
Tur persona mester trese un identifikashon bálido di su mes i di kada asistente ku lo laborá huntu kuné. Si e persona ku ta hasi e petishon òf unu(òf mas) di su asistentenan ta estranhero mester presentá tambe kopia di un pèrmit di estadia òf kopia di e petishon pa un pèrmit nobo. Huntu ku esaki mester trese un sertifikado di salú di e bendedó(Tur asistente mester tin nan karchi di kùr di G&Gz (antes GGD) durante e evento), komprobante di pago pa e pèrmit, komprobante di pago di prekario, kopia di reibeweis, karchi di kùr i resibu di seguro i papel di number di outo(e ultimo aki ta konta solamente pa esnan ku kier bende kos di forma ambulante).

Na momentu di entrega di e pèrmit ta pidi tambe un stampia na balor di 10NAFL. pa e ventvergunning i 20NAFL pa e standplaatsvergunning

Pa por hasi petishon pa ámbos pèrmit (vent- òf standplaatsvergunning) pa temporada di karnaval 2018 mester akudí durante oranan di ofisina na lokèt di pèrmit na Saliña 127 pegá ku Subway.

Tuma nota ku personanan ku ya ta bende kos riba e ruta di karnaval mester hasi petishon tòg pa por risibí un pèrmit spesífiko pa karnaval 2018. Tin posibilidat te ku djabièrnè 12 di Yanüari 2018 pa por entrega petishon pa un pèrmit.
Pa mas informashon un i tur por tuma kontakto libremente ku Lokèt di Pèrmit na tel 433-3100.