Ku hopi orguyo i plaser Fundashon Bon Intenshon ta yama bon biní na kantante/aktor Harry Belafonte na e di 4 edishon di Curaçao North Sea Jazz Festival dia 30 i 31 di ougùstùs. Harry Belafonte lo tin un speech na su enkargo durante e di 4 edishon aki titulá: E konfirmashon di e commitment pa Pas Duradero i Hermandat pa tur hende atraves di músika. E kompositor/kantante, aktor i aktivista Merikano Harold George “Harry” Belafonte (1927), konosí tambe komo “Rei di Kalipso” pa a popularisá e ritmo Karibense aki serka un publiko internashonal den dekada 50, ta mundialmente konosí pa su vershon di The Banana Boat Song. Durante su karera den e ambiente di músika i teater, Belafonte semper tabata un aktivista pa derechi humano. Na 1950 el a sostené Movementu pa Derechi Humano Merikano i e tabata un siguido ferviente di Martin Luther King. Na 1985, e la yuda organisá e piesa ganador di grammy We Are The World  pa rekaudá findo pa Afrika. Na 1987 a nombra Belafonte komo Embahador di Bon Kousa pa UNICEF kua ròl e ta kumpli ke n’e te dia di awe.