Willemstad, – Teatro Luna Blou i su nochi di Chiste tabata un éksito i e djarason aki lo bolbe ripití ““ Wednesday Comedy Happy Hour” i komo invitado Speshal lo tin Pachi Damon. Djarason 11 mart 2015 na Teatro Luna Blou kompletamente Gratis. Harimentu ta salu i Teatro Luna Blou ke pa pueblo di Kòrsou ta saludabel. Ta p’esei a introdusí  “ Wednesday Comedy Happy Hour”. Tur djarason patio di Teatro Luna Blou lo ta esenario pa e mihó  kontadónan di Chiste subi esenario i presentá. Edion “Loloi” Booi ta presentadó di e anochi kontentu aki. E ta bai presentá pa bo su mihó chistenan, anékdotanan, charada i tambe situashonnan kómiko. Tur siman e tin un invitado speshal ku ta sali for di e mundu di komedia. E biaha aki e lo tin Pachi Damon. Aparte di esei lo tin un sekshon kaminda públiko lo por disfrutá di videonan kómiko presentashon sea pa Tan Cleta, Olo, Robby  i hopi di e diferente ròlnan ku Edion a yega di hunga den su karera komo komediante.  E loke ku ta hasi e anochi mas emoshonante i interesante ta ku e públiko tambe por partisipá i gana premio. Tur djarason nos ta saka e mihó kontadó di chiste di e anochi. E ganadó ta risibí premio kèsh, karchi di miembresia di teatro luna Blou i mas. Siman pasa Curtley Ignacio tabata e ganadó di e nochi di Chiste. Si bo ke partisipá tuma kontakto ku teatro Luna Blou na telefon 462-2209 òf na telefon 524-8525. Tambe bo por inskribí via di message i whatsapp. Komo si fuera no ta basta despues di e tremendo presentashon di Edion Booi, Magic ta bai toka pa bo balia. Xemio Jacobs huntu ku Roella J a prepará un repertorio bon varia ku músika pa tur generashon. Psssss nos no a lubidá riba e bibida nan ku lo ta na un preis speshal. Pues tur hende ta bon bini pa bin gosa den un ambiente masha dushi mes riba patio di teatro Luna Blou. Blou Blou patio ta habri for di shet’or  i e ambiente ta kontinuá te diesun’or. Pues e ta kaba trempan pa tur hende bai kas trempan i sosegá nan kurpa pa bai traha siguiente dia. Teatro Luna Blou ta invitá bo na ”Wednesday Happy Hour”. Nos ta warda bo, entrada ta kompletamente grátis. Pa mas informashon yama teatro Luna Blou na 462-2209 òf bishita nos website www.lunablou.com