‘Halfweg’ ta presentashon di un monólogo musikal nobo di e hóben hasidó di teatro, aktris nasé na Kòrsou, Dichi Wit.

Halfweg ta e munisipio hulandes kaminda su tawela, desendiente di Sürnam a biba un gran parti di su bida. Tambe Halfweg ta para pa e fase di bida kaminda e personahe den e obra, interpretá pa Dichi Wit, ta aktualmente.

Theatre Foundation Work in Progress resientemente fundá, a tuma Dichi Wit kompletamente bou di su alanan pa logra su meta di por brinda sosten na hóben ku ke sigui desaroyá nan talento i na mes momentu agregá produkshon ekstraordinario na bida di teater na Kòrsou.

Dichi Wit ta sinti su mes un meskla di diferente rasa, konektá ku e herensia kultural di su antepasadonan. Un seshon di investigashon ku ta dura dos luna riba su isla natal ta reflehá den un obra fasinante ku músika na enkargo di Eric Calmes riba kitara, Richard Doest riba perkushon, ku sosten di hasidó di teater Albert Schoobaar i Milushka Birge. Públiko por eksperensiá e búskeda riba un isla manera Kòrsou ku mas di 52 nashonalidat, huntu ku Dichi Wit. Kada bishitante di e piesa, chikitu i grandi, por saka su propio konklushon riba e pregunta ta ken nos ta en realidat.

Durante di e presentashon ta papia hulandes, papiamentu i ingles.

Dichi Wit, ta konosi di su partisipashon estelar algun aña pasá na e prome edishon di Curastars, awor e ta gradua komo aktris i kreadó di teatro na ‘Amsterdamse Hogeschool voor de Kunsten’. Mirando su produkshonnan anterior, manera ‘Knooppunt Jeruzalem’ (2013) i ‘Waar blijft de tijd’ (2015) i tambe ultimo parti di e ensemble di e musikal mas eksitoso di Hulanda ‘Hij gelooft in mij’, el a demostrá di ta un aktris i hasidó di teatro masha pekuliar.

E presentashonnan lo tuma lugá na Teatro Luna Blou riba djamars dia 3 di novèmber i djárason dia 4 di novèmber pa 19:30’or. Karchi ta kosta fl.12,50 i ta optenibel na Teatro Luna Blou i Mensing’s Caminada. Sigi tur informashon via www.facebook.com/dichihalfweg