Willemstad, Curacao, Gruponan di karnaval Wepa I tambe Estreno MAS Pikete den estrecho koperashon ku Massive productions huntu ku nan partnersnan Sambil I Garage Cordia durante di un rueda di prensa ayera na Sambil a presentá……. Hak’e, Curacao Jump In festival. Hak’e ta e promé Festival di Jump In ku lo tuma luga dia 30 di Januari 2016 riba e tereno di Sambil. E festival lo konta ku 100% artistanan lokal i lo tin un durashon di 8 ora ku muzik bibu NÒN-STÒP. Durante e festival lo tin 4 stage kompletamente harmá pa asina tur banda lo por toka den un estilo di 1 pa 1. Ora un banda kaba e otro por kuminsa mesora. Sin intervenshon di DJ mei mei di e diferente sètnan.
Hak’e lo tin e siguiente bandanan: Dreams, GIO, Gentz, Dolce, Happy Peanuts, O’vega, Score I Wepa Band huntu ku artistanan invitá manera Quincy Amasia, Hunnely Felicia, Tico “Benoni” Balentin, Ike Jesurun, Reinier Lijfrock, DJ RO-1 i hopi artista di sorpresa mas. Manera ta di kustumber Wepa Band lo tin e sekshon di potpourri di Tumba ku e organisashon lo anunsiá despues ta kwa Tumbero lo tei presente den e promé edishon aki.
Di parti di e organisashon a skohe e titulo di Hak’e pa e motibu ku e titulo aki ta simbolisá e himo di ambiente durante tur jump in na Kòrsou. Saliendo for di e tumba historiko di Edwin Tomasa i transformá pa musikonan i fanatikonan di jump in den un himno di ambiente. Hak’e lo ta e festival di Jump In kaminda abo por disfrutá di bo artista faborito durante 8 ora largu, pagando solamente 50 florin pa bo entrada. Asinaki Estreno MAS Pikete i Wepa ta inisiá e promé festival di Jump in na Kòrsou kontando ku respaldo di 100% artistanan lokaal den temporada di karnaval. Estreno MAS Pikete huntu ku Wepa, dos grupo di karnaval relativamente jòng pero ku sigur ku un aporte sumamente grandi na nos karnaval, gradesiendo nan partnersnan Sambil I Garage Cordia ta lansa e prome festival di Jump In na Kòrsou, Hak’e. Sigi medionan di komunikashon pa mas informashon di artistanan ku lo presentá den e festival aki I tambe pa diferente sorpresa segun e fecha di 30 di januari 2016 ta aserkando