Willemstad – Ya kaba pa por lo ménos tres luna, oyentenan di radio emisoranan ta skuchando mas piesa nobo di e agrupashon musikal tòp, GIO Fuertisimo. Tur ei ta piesanan ku ta figura riba e produkshon musikal nobo di e agrupashon. Tin algun kaba manera entre otro ‘Pasku Enamorá’ y ku ta konosí kaba ku tambe ta un piesa ku tambe ta parti di e produkshon. Esei ta zona bon sin duda i a lanta kuriosidat bou di e fanátiko di GIO i demas amantenan di bon músika. E produkshon aki ta ser dediká na Jose “Uti” Gregorio.

Habri P’e

Manera ta konosí e produkshon ta karga e nòmber di Habri P’e kual ta un tumba komponé i areglá pa Gibi Doran y interpretá pa Djuric Virginie. E tumba aki ta brinda un mensahe di speransa pa nos tur na Kòrsou pa nos drenta e aña 2015.

Pasku Enamorá

E kansion pe temporada di Pasku aki a ser komponé, areglá i interpretá pa Dibo Doran y Clinton Hato. E kansion aki a wòrdu aseptá en grande pa e públiko no simplemente pa e dushi melodia sino tambe pa e temporada spesial di fin di aña.

Habri P’e ta konsistí di 10 piesa ku diferente ritmo den bos di Dibo D, Rasta Le, Djuric Virginie i tambe Gibi Doran mes. Pues sin duda komo amante di bon músika i fanátiko ku a kustumbrá di disfrutá di GIO Fuertisimo, bo mester pasa na bo diskobar faborito, kumpra bo produkshon pa asina apesar di ta parti di bo kolekshon, bo por disfrutá den bo outo, kas, ofisina i kaminda bo ta di e bon músika di e Fuertisimonan di GIO.

Músikonan orguyoso

Sin duda Gibi Doran i e demas famia Fuertisimo ta mas ku orguyoso ku e logro aki. Hopi tempu, pasenshi i amor a wòrdu invertí den esaki speshalmente pa pueblo di Kòrsou i tur fanátiko di GIO i ta spera ku un i tur ta apresiá esaki. Un petishon ta bai na tur hende pa kumpra bo produkshon original i no kopia.  Un danki na un i tur ku di un òf otro manera a kontribuí pa e produkshon aki bira realidat. Un danki na fanátiko nan ku ta kargando e banda aña aden i aña afó durante 21 aña, paso sin fanátiko no tin GIO!!!