Willemstad – Grupo ViVa ta un di e gruponan popular den e último tempunan pa loke ta trata gruponan di karnaval. E grupo aki ta wòrdu rekonosé tur aña di nobo ku su trahenan espektakular i e headpiece nan ku hopi pluma i stenchi. ViVa sigur ta un grupo di hóbennan profeshonal ku ta sostené nos Karnaval i semper ta para habrí pa yuda gruponan di tantu mucha, tiner òf hende grandi.

Den un esfera di happy hour na Brakkeput Mei Mei ViVa a presentá su trahe ku e lo bai desfilá den marchanan di Karnaval 2018. Despues ku aña pasa nan a selebrá nan di 10 aniversario, e aña aki ViVa a skohe un trahe for di e kontinente di Asia pa bai marcha kuné ‘Singa Barong, the art of Reog dance’.

Ku e trahe aki bo por disfrutá un tiki di e kultura Balines i su baile tradishonal ku ta wòrdu yamá “the Reog dance”. ViVa por wak bek riba un anochi super eksitoso kaminda bunita trahenan a wòrdu presentá na e partisipantenan,  amigunan i algun invitadonan speshal ku tabat’ei presente e anochi aki.

Un mensahe tambe ku Grupo ViVa a trese dilanti durante nan presentashon djabièrnè último ta pa komunidat respetá kada grupo ku presentá nan kreashon, paso esaki no ta nada fásil i ta hopi trabou tin tras di kada un di e trahenan ku wòrdu presentá. Pues e trabounan pa krea un trahe di kada grupo mester wòrdu respetá i apresiá, paso kon ku bai bin ta tur e grupo nan aki ta forma e espektákulo.