Un wikènt pe amante di Salsa i Vallenato…

WILLEMSTAD.- Kòrsou ta pendiente di bai disfrutá di un wikènt karga ku músika di Salsa i Vallenato. Grupo Niche i Jean Carlos Centeno lo ta na Kòrsou pa presentá nan éksitonan grandi. Grupo Niche no mester di niun klase di introdukshon aki na Kòrsou. Niche den pasado a yega di presentá na vários okashon i ta konta ku un grupo grandi di fanátiko. Nan éksitonan manera ‘Una Aventura’, ‘Gotas de lluvia’, ‘Hagamos lo que diga el corazon’, ‘Cali Ají’ i asina por sigui menshoná. Jean Carlos Centeno, a gana fama komo e kantante i kompositor di ‘Binomio de Oro de America’. Ela kanta éksitonan di Binomio manera ‘Manantial de Amor’, ‘No te Vayas’, ‘Celos’ i e mes a graba ‘Volvió el dolor’ i ‘Me va a extrañar’ djis pa menshoná algun.

FIESTA BALIABEL

Grupo Niche dia 7 di novèmber lo presentá den un fiesta baliabel na Mathey Werf (Otrobanda) huntu ku Doble R Klásiko. Un fiesta ku sigur e amantenan di Salsa no por pèrdè. E fiesta ta kuminsá pa 9’or di anochi i terminá pa 2’or di mardugá. Karchi pa e tremendo fiesta aki ta kosta 65 florin general i VIP ta kosta 250 florin.

NOCHE COLOMBIANO

Djasabra 8 di novèmber lo tin e ‘Gran Noche Colombiana’ riba Kleine Werf (Scharloo Punda). Riba e anochi aki lo tin presentashon di Jean Carlos Centeno i Grupo Niche. Den antesala lo tin presentashon di Orkesta Wesu. E konsierto aki lo kuminsá pa 8’or di anochi i ta terminá pa 2’or di mardugá. Karchi pa ‘Noche Colombiana’ ta kosta 65 florin pa sekshon general i 350 florin pa VIP.

GIMMICK

Djasabra awor, 11 di òktober 2014, for di 12’or di mèrdia te ku 6’or di atardi na ‘Restorant WEPA’ na F.D. Rooseveltweg lo bai tin karchi di entrada pa tantu e fiesta di 7 novèmber komo e konsierto dia 8 novèmber na e preisnan speshal di 50 florin pa sekshon general ku normalmente ta kosta 65 florin i VIP na 200 florin kual su preis normal ta 250 i 350 florin. Lo bai transmishon di Radionan Mas, Direct i Z-fm

SIMAN DI SALSA
Speshalmente pe bishita di Grupo Niche lo bai tin un ‘Siman di Salsa’ ku workshop i kompetensia di baila Salsa riba éksitonan di Grupo Niche. E siman di Salsa lo tuma lugá di 3 te ku 6 di novèmber 2014. E sitionan di workshop i kompetensia di baile lo keda anunsiá próksimamente. Bin siña baila Salsa, kompetí bailando Salsa i prepará bo mes pa e grandioso fiesta baliabel di Grupo Niche i Doble R na Matheywerf dia 7 di novèmber.

BENTA DI KARCHI

Karchi pa sekshon general di ámbos evento ta optenibel na Mensing’s Caminada, Albert Heijn, Tik Tak, Beep Beep, Pagadero (Saliña), Restaurante Doña Elena, Restaurante Wepa, Parts 4 You (Rooseveltweg) i el Rancho de Alex (Sta. Rosaweg). Karchi nan pa sekshon di VIP ta optenibel únikamente na Pagadero (Pablo Frederik Saliña) entre 12’or di mèrdia pa 6’or di atardi. Pa mas informashon por manda imeil pa nochecolombianacur@gmail.com, bishita e página facebook: nochecolombiana òf yama 526-0692.