Fiesta di Simia den Marcha di Seú 2018

Willemstad, Febrüari 2018 – Djasabra anochi e grupo nobo di seú ‘Sembradó di Speransa’ a hasi su demostrashon di trahe na públiko. E grupo aki i su partisipashon den Marcha di Seú 2018 ta un inisiativa di Fundashon Motivá, Guia i Protehá (FMGP) enkabesá pa e hóben Christopher de Wind ku ta presidente di e Fundashon i alabes lider di e grupo Sembradó di Speransa.
Durante e anochi aki Christopher de Wind a splika ku e grupo no a lanta solamente pa e temporada di Seú mirando ku meta di e grupo ta pa sembra speransa pa nos por kosechá amor, sabiduria, rèspèt, union i formashon den nos komunidat. Ku esaki en mente a skohe tambe pa kuminsá e anochi ku un tayer interaktivo di Seú, promé ku demostrá e trahenan.

Fiesta di Simia
Hopi bes nos komo ser humano no ta duna elogio i atenshon na nos propio logronan personal, pero si nos ta selebrá ku kosnan superfisial i material. A yega ora pa nos trese un kambio na esaki i kuminsá selebrá nos propio logronan i tambe logronan di otro i p’esei grupo Sembradó di Speransa su tema pa Seú 2018 ta ‘Fiesta di Simia’. E simianan ta simbolisá logronan individual di kada siudadano riba nos dushi isla.

E grupo Sembradó di Speransa lo bai tin dos sekshon, esta Simia Zut i Simia Dushi i e grupo kompleto lo wapa riba e dushi ritmo di e banda di hóbennan di momentu Young Music Group (YMG). YMG tambe ta partisipando pa promé biaha den Marcha di Seú, pues esaki sigur ta un prueba di e enfoke i deseo pa engrandesé nos fiesta kultural di mas importante.
Pa esnan ku ta interesá den forma parti di grupo Sembradó di Speransa i nos Fiesta di Simia òf lo ta deseá mas informashon, por tuma kontakto libremente ku Jenisse Gil na telefon + 5999 676 1768 òf via página di Facebook di Fundashon Motivá, Guia i Protehá.

Grupo Sembradó di Speransa ta deseá pueblo di Kòrsou en general un dushi temporada di Seú i laga nos tur huntu ban uni den Fiesta di Simia, kual ta simbolisá selebrashon di kada un logro personal i alabes plantashon di mas simia pa nos por kosechá mañan.