DEN HAAG – E di djesdos entrega di Appeltjes van Oranje tabatin un toke kurasoleño spesial e aña aki. Durente e entrega na Palasio Noordeinde na Den Haag, e grupo di baile prosedente di Kòrsou D’Art Holland dirigi pa Reynard “Nato” Francisca a saka kara ku dos baile basá riba e repertorio musikal di Ike Jesserun (‘Mazurka’) i Marvin Snijder (kantika di seú: ‘Waya bo bandera’). Su Mahestat Rèina Máxima a hasi entrega di Appeltjes van Oranje 2015 den presensia di Su Mahestat Rèi Willem-Alexander i Su Altesa Real Prinsesa Beatriz. Despues di e entrega, D’Art Holland a ser felisitá p’e miembronan di famia real aki riba menshoná, ku a keda enkantá ku tantu e presentashon komo e presioso trahenan ku e grupo a lusi inspirá riba un di Kòrsou su tesoronan nashonal ku ta Handelskade. E grupo di baile, ku ta parti di e kompania di baile D’Art Curaçao ku ta famá na Kòrsou, ta konsistí di 30 hóben entre 18 i 27 aña ku tin komo meta e fomento di e kultura di pais Kòrsou pa medio di arte eséniko. Den e pasado añanan D’Art Holland tabatin aktuashonnan úniko na diferente pais oropeo. Aktualmente e grupo ta trahando riba un proyekto di bon kousa den kua lo ofresé hóbennan medionan pa nan por sigui desaroyá nan mes riba e tereno di arte eséniko.