WILLEMSTAD – Fin di aña pasá Green Phenix huntu ku Coca-Cola a lansa un kampaña den kua a hasi un yamada na komunidat pa resiklá plèstik. E kampaña di konsientisashon aki #maketheturtlesmile ta sòru pa e materialnan no bai pèrdí i duna nan un bida nobo den forma di un produkto fabriká lokal. E organisadónan ku orguyo ta partisipá ku nan a logra nan meta di kolekshoná 30.000 bòter di plèstik.

Durante e kampaña aki a pidi tur hende pa entregá nan bòter di plèstik na Green Phenix den Sambil òf na nan filial na Zeelandia. Pa kada 25 bòter òf bleki di aluminio ku entregá e partisipante ta risibí un stèmpel. Ta spar e stèmpelnan pa premionan fabuloso pero tambe útil. Hopi kompania lokal a pone e preisnan aki disponibel, manera bale di Intertoys, De Dames, Flipside; entrada pa Cinemark; daypass di Kunuku Aqua Resort; entrada pa kuebanan di Hato i Xtreme Zone; pèchi di STCC; all inclusive trip pa Klein Kòrsou ku Miss Ann, D-bottles i ‘custum made’3D print.

Maske a alkansá e meta ta kontinuá ku e kampaña te fin di luna. Esnan ku ainda ke partisipá por entregá plèstik number 1,2 i 5 ku a usa i bleki di aluminio na Green Phenix Sambil (pegá ku entrada di Caracasbaai) di djaluna te ku djasabra di 8’or di mainta pa 5’or di atardi i na Green Phenix Paviljoen Zeelandia riba djaluna, djamars, djaweps i djabièrnè di 8’or di mainta pa 5’or di atardi.

A ehekutá e promé vershon di #maketheturtlesmile na 2019 i a kolekshoná 30.573 bòter i a enfoká prinsipalmente riba muchanan di skol. E di dos edishon di e kampaña ta mas dirigí riba partisipantenan individual. E meta mas prinsipal ta pa hasi nos hendenan konsiente ku resiklahe ta great i ku por traha produktonan nobo ku material ku a usa kaba. Pasombra: plèstik ku a usa no ta desperdisio, di esaki por traha produktonan nobo. Mientrastantu Green Phenix i Coca-Cola ta deliberando pa pronto sigui ku e kampaña eksitoso aki.