Artistanan grandi ta uni pa un anochi diadomingo 13 di december

ORANJESTAD, DECEMBER 2015 – ARUBA: Durante un conferencia di prensa na Renaissance Convention Cenyer a wordo anuncia cu diadomingo anochi dia 13 di December 2015 Aruba lo conoce un concierto di pasco unico den historia. Ta trata aki di un concierto di pasco cu ta conta cu musiconan sumamente popular. E anochi di pasco aki lo conta cu presentacionan di Grupo Di Betico, Buleria, Ataniro, Paranda ta Nos, Fuente, Cesar Olarte, Jerrino Bas, Biggy Boy y hopi mas. No ta tur dia cu Aruba ta haya e oportunidad di mira e cantantenan y bandanan aki riba un solo tarima intepretando exitonan di pasco. E repertorio lo consisti di temanan original como clasiconan di pasco y fin di aña. E anochi aki lo ta uno special tambe mirando cu parti di e fondonan lo bay destina pa un bunita causa.

Pa por organisa un concierto asina magistral a wordo dicidi cu Renaissance Convention Center lo ta e sitio unda cu e concierto lo tuma lugar. Un lugar hopi ideal cu lo wordo transforma den un fantasia navideño.

Carchinan den pre-benta cu un prijs special ta na venta pa 35 florin y asina cu e cantidad limita caba e prijs ta bira 45 florin pa persona. Na porta e lo bira 55 florin. E carchinan ta obtenibel na Texaco Sasaki, Hamaka Side Walk Caféy Gallo Rojo.

E anochi sigur lo bira un inolvidabel mirando cu e musiconan ta ensayando hopi intensivo pa por presenta un bunita espectaculo pa e famia completo.

Patronisadornan cu a kere den e proyecto ta Tropical Bottling Company, Elite, Digicel, Buleria, Nagico y The PrintShop.