Proyekto di hoteleronan Avila/Lions Dive i desaroyadónan di IHDG
WILLEMSTAD – Awe tardi den Voyager Lounge di Avila Beach Hotel gobièrnu di Kòrsou i e invershonistanan a pone nan firma bou di un konvenio pa desaroyo di Santa Martha i besindario. Ta trata di un proyekto ekstenso di e famianan Vogels i Van Alstede pa remplasá e área di loke tabata Coral Cliff/Sunset Waters Hotel i ku ta tur dekaí.
Gerente General Robbin Vogels di Avila Beach Hotel i desorayadó di proyekto Phillip van Alstede di IHDG komo doñonan nobo di e área ku tabata konosí komo Coral Cliff, a duna e invitadonan, entre nan promé minister Eugene Rhuggenaath, e ministernan Zita Jesus-Leito (VVRP), Steven Martina (Desaroyo Ekonómiko/Turismo) i Kenneth Gijsbertha (Finansa) informashon di e plannan. Señor Vogels a splika ku den e promé fase lo konstruí denter di 3 aña un hotèl all-inclusive di 200 pa 300 kamber ku lo bai manehá bou di nan guia. Esaki ta rekerí un invershon di 100 mion florin i kaminda finalmente alrededor di 250 persona lo haña trabou. Den algun fase lo ekstendé e kantidat di kamber di hotèl ku mas hotèl ku entre 700 pa 800 kamber na total, kaminda na su debido tempu lo krea entre 1000 pa 1500 puesto di trabou. E plan total aki ta rekerí un invershon di minimalmente 250 mion florin i lo parti esaki den un periodo di 10 aña.
Aparato diligente
Desaroyadó Van Alstede a splika ku aparte di e hotèlnan i tur e fasilidatnan ku mester aserka, e proyekto ta enserá tambe konstrukshon entre otro di un marina ku aktividatnan akuátiko den e benewater grandi di Santa Martha i aktividatnan den naturalesa, manera korementu di kabai, etc. Ademas, konforme e konsepto ‘farm to fork’, lo kumpra mas tantu produkto posibel di kultivo di ortikultura i agrikultura ku e wéspetnan di e hotèlnan por mira den besendario i di piskadónan for di Gran Santa Martha (tambe di Soto i besindario).
Finalmente direktor Will Vogels di Lions Dive Hotel a ekspresá su apresio pa e diligensia ku gobièrnu i e ministerionan envolví a demostrá, for di yüni e aña aki, pa reakshoná rápidamente riba petishonnan pa pèrmit i areglonan. Esaki ta fasilitá e desaroyadónan pa riba e término mas kòrtiku posibel kuminsá ku ehekushon di un proyekto sin presedente na Kòrsou na Bándabou.
Na nòmber di e desaroyadónan Robbin Vogels i Phillip van Alstede a firma e konvenio ku minister Zita Jesus-Leito di VVRP, miéntras ku nan partnernan di negoshi Will Vogels i Maarten van Alstede a para opservá.