Willemstad – E momentu a yega ku Shamiro Anita lo bai duna su Gran Konsierto, titulá “Nunka Entrega”, kombina ku shownan espektakular. Den e konsierto aki Shamiro lo bai motiva tur esnan presente pa Nunka Entrega i sigui perseverá maske kon duru e bataya ta, paso Dios semper tei pa yuda i den Dios nan soñonan lo realisá.  E evenementu aki lo tuma luga djasabra, 30 di september 2017, den e Hall di International School kuminsando 7.30 di anochi. Esaki lo bai ta e evenementu ku Korsou tin mester na e momentunan aki.

Henter famia lo disfrutá di e Gran Konsierto & Show aki. Lo bai tin kantikanan na Papiamentu, Spaño i Ingles ku ritmonan varia i ekspreshonnan bunita di arte manera Grand Choir, Modern Dance, Light and Fire Show, Baile, Laser Show, Akrobasia i hopi sorpresa mas.

Loke ta hasi e evenementu aki algu uniko i bunita, ta ku ta bai tin e miho geuststars, artistanan i gruponan di Kòrsou i internashonal ku lo kompaña Shamiro riba e senario.

E evenementu  aki ta krea e posibilidat i motiva foral nos hobennan ku ta partisipa of bishita e Show Espektakular aki, pa nan hasi kosnan positivo ku e talento ku nan tin den kanto, baile, musika of otro tipo di arte. Ta trata aki di un Fundraising pa yuda Shamiro p’e por sigui desaroya su musika, kreando mas kantikanan i videoclipnan positivo yena k’e palabra di Dios, bendishonando asina tur hende di skucha su kantikanan i/of mira su videoclipnan.

Karchinan ta obtenibel na Mensing, Beep Beep, Kas di Beibel, Tik Tak i 24 uur uit de Muur. Preis di karchi ta solamente fl.35,– . Kumprando karchi bo ta kopera i yuda Shamiro.

Tur djadomingu Shamiro lo presenta na e diferente Misanan/Iglesianan kaminda tur esnan presente por kumpra karchi na un preis special ku ta balido na e momentu ei so !.

Shamiro ta invita tur nos muchanan, hobennan i adultonan pa bin ku henter famia pa biba “Un Brasa So Mi Ke”, selebra Dios su amor ku por “Move Tur Montaña”, sinti kon Dios por “Kalma E Tormenta”, dis “Hala Un Rosea” i “Nunka Entrega”, paso Dios lo yuda. Hopi ta esnan ku ahinda ta korda kon bendishona e konsiertonan di Shamiro tabata. Korda tambe ku tur Shamiro su konsiertonan batata yen yen i karchi a yega di kaba for di  trempan. Pesei sigura i kumpra bo karchi for di awor. Sigui impakta mas i mas hende ku mensahenan positivo, kreando dushi ambiente di pas i bendishon prinsipalmente ku e palabra di Dios, ta Shamiro su meta pa medio di su kantikanan. Bin eksperensia e Gran Konsierto “Nunka Entrega” huntu ku Shamiro & Friends den e Hall di International School dia 30 September  2017 den Emmastad.