WILLEMSTAD — Direktiva di AMAK a tuma nota di fayesimentu di Don Macario Prudencia, un músiko kompositor kantante ku a marka historia den Farándula di Kòrsou pa e echo ku el a krea e ritmo Salsa Antiana, pero alabes el a traha un gran kantidat di komposishon ku a skor hopi haltu na nos radio emisoranan lokal. Makai ya pa basta tempu tabata lucha ku salú un ke otro tambe okashoná pa un aksidente di outo ku el a sufri hopi aña pasa. Makai durante su temporada ku e tabata aktivo den Farándula, e tabata hala fiestanan yen,m sigur despues di e tempu ku el a disidí di lanta su propio agrupashon musikal lokal. Makai a kosecha hopi éksito na Islanan ku tabata forma parti di Antia, pero tambe na Ulanda, kaminda tambe el a biba pa algun aña. Direktiva di AMAK ta kontentu di por a honra Makai na bida. Ku sosten di Maduro & Curiels Bank, a organisá na aña 1991 un manifestashon kultural, durante kua Macario Prudencia a ser invitá for di Ulanda, pa bin partisipá den selebrashon di 75 aña MCB. Aña pasa na luna di ougùstùs, Makai a risibí un tremendo homenahe na Betesda un biaha mas ku kooperashon di Maduro & Curiels Banko i Junior All Stars. Na 1996 Festival di Salsa a keda dediká na Macario Prudencia i direktiva di AMAK a proponé tambe pa honra Makai ku un nòmber di kaya den Bonam. Makai a risibí tambe pen di mérito di Asosiashon di Músiko i Artista di Kòrsou. Don Macario Prudensia, a marka historia pa su hazañanan musikal i meresidatemente semper pueblo a dun’é su honor. Direktiva di AMAK ta deseá su señora, su yunan, de mas famia i mundu farandulero forsa ku e pèrdida sensibel aki i nos ta sigur ku Makai lo haña un bon lugá den Reino Selestial. Makai sosegá na pas