Mientras region di Caribe ta cay cu -4.3%

Mientras profetanan di desaster ta haciendo tur nan esfuerso pa mustra un imagen negativo di turismo na Aruba, cifranan ta mustra net lo contrario, presentando un imagen positivo pa loke ta trata luna di juni.

Minister Otmar Oduber a presenta e noticia cu mientras cu den Caribe na juni e grado di ocupacion di hotelnan a cay cu 4.3 porciento, for di un 69 porciento na 2015 pa 64.7 porciento na 201, na Aruba esaki a crece cu 7.4, for di 70.5 porciento na 2015 pa 77.9 porciento e aña aki. Un diferencia di riba 10 porciento entre Aruba y resto di Caribe.

E titular di turismo a indica tambe cu pa loke ta bay di aña, esta e prome 6 lunanan, hotelnan den Caribe a conoce un caida den grado di ocupacion di -2.5 porciento y ta keda na 70.1 porciento, mientras cu aki na Aruba e averahe den grado di ocupacion di hotelnan durante e prome 6 lunanan di 2016 ta keda na 79.0 porciento, atrobe 9 porciento mas halto cu esun di Caribe. Esaki comparando cifranan den Caribe di Smith Travel y aki na Aruba cifranan di AHATA.

E cifranan aki ta un refleho di maneho di Minister Oduber cu ta wordo ehecuta dor di e diferente actornan den nos industria principal y cu ta enfoca riba e turistanan afluente. Resultado di e cambio di enfoke aki a demostra di ta uno exitoso unda por a mira un crecemento substancial unda cu na 2012 e bishitantenan super afluente procedente for di Merca, cual ta nos mercado principal, tabata representa solamente 7 porciento di e turistanan proveniente for di e region aki y na 2015 esaki a aumenta te na 25%.

E trabounan pa loke ta nos industria di turismo ta leu di ta cla, ta trata di un trabou continuo y cu ta rekeri pa tur actor ta riba mesun liña siguiendo un maneho enfoca pa mantene nos isla dos stap dilanti di nos competidornan y unda un y tur por disfruta di e beneficionan di e industria.