Produkshon di PWF ku apoyo di Sambil

WILLEMSTAD – Den su afan pa informá komunidat di Kòrsou di un forma habrí i sinsero riba e diferente elementonan di kanser, e fondo pa kombatí kanser Prinses Wilhelmina Fonds (PWF) a laga graba tres programa relativamente kòrtiku. Esaki a sosodé ku apoyo finansiero di e sentro di kompra Sambil Curaçao. Señora Alba Martijn komo presidente di PWF a splika na un konferensia di prensa ku na novèmber último señora Fanny Cohen, un di e doñonan di Sambil, a aserká nan pa puntra kon nan por duna sosten konkreto na e organisashon aki. Na Venezuela Sambil ya tin un trayektoria di duna apoyo na proyektonan sosial, inkluso na e lucha kontra kanser.

Tres relato habrí

Un di e deseonan mas grandi aktualmente di PWF ta pa graba algun vidio kaminda sobrebibientenan di kanser di un forma habrí, sin kita sin pone, ta konta nan eksperensia ku e malesa aki. Den nan relato nan ta konta kon a detektá e kanser, na ki momento i kon a informá nan, i kon esaki a afektá nan i nan famia. Tambe nan ta relatá kon nan a drenta e tratamentu kontra kanser i kon nan a eksperensiá e trayekto aki i kon nan a sigui ku nan bida durante i despues di e periodo difísil aki. Na final nan ta konta kon por prevení, konfrontá i sobrebibí kanser òf biba kuné.

Dos adulto i un hóben ta kompartí nan eksperensia ku komunidat. Loke ta resaltá den kada un di e testimonionan aki ta nan kurashi, nan forsa di boluntat i nan perseveransia. Kada un di nan a disidí pa no laga kanser determiná kurso di nan bida. E señora Ingrid Adoptie-Kross ta konta ku kanser por bati na porta di kada un di nos. E hóben Justin Penza ta mustra kon kanser no ta diskriminá i por afektá mucha tambe. Señor Harvey Faries ta enfatisá pa papia habrí i no purba skonde e kanser.

Aktua na tempu

Señora Martijn a bisa finalmente ku ora tin un ola di atrako, e hendenan den e barionan ta pone hèkwèrk i alarma na nan kas i kandal na nan porta di kurá. Kanser tambe por ataká den kada bario. P’esei el a boga pa tur hende spièrta, buska bon informashon i tuma akshon apropiá pa tene kanser mas leu posibel di bo mes i bo sernan kerí. Importante ta pa realisá ku kanser ta kurabel basta bo ta na ora. El a gradisí e tres personanan ku a bini dilanti, pero tambe señora Fanny Cohen i su yu hòmber Jonathan, i tur esnan ku a koperá pa realisá e grabashonnan aki.