…Dia 21 di mart próksimo dediká na Stichting Shimaruku Curaçao…
WILLEMSTAD- Mart 2015- Curaçao Marriott Beach Resort & Emerald Casino den kuadro di nan programa komunitario ‘Spirit to Serve’ un bes mas ta orguyoso di por ta anfitrion pa e ‘Marriott Charity Golf Tournament’. E evento aki lo tuma lugá dia 21 di mart riba e kancha di gòlf di Blue Bay Curaçao i tur fondo rekoudá lo bai pa Stichting Shimaruku Curaçao. Esaki ta e di 4 bes ku e torneo ta keda organisá.
Stichting Shimaruku Curaçao:
Stichting Shimaruku Curaçao a wòrdu fundá pa Innerwheel Curaçao na 1996. E mishon di Stichting Shimaruku ta pa kontribuí na desaroyo positivo di e muchanan di e bario di Seru Fortuna. Pa algun aña konsekutivo e fundashon a bin ta sòru pa tantu desayuno komo kuminda kayente pa tur mucha ku ta bishitá kolegio Dodo Palm na Seru Fortuna, esaki danki na algun spònser grandi i kontribushon di voluntarionan. Pa duna mas prestigio na e mishon di e fundashon a opta pa hasi un súplika na komersio pa spònser e fundashon ku un bus pa por brinda e muchanan transporte pa akudí na aktividatnan pafó di e bario. E donashon aki lo brinda e muchanan un bista amplio di kiko tin pafó di Seru Fortuna i demostrá ku nan opshonnan no mester ta limitá.
Kompetensia di Gòlf:
E evento lo kuminsá djabièrnè 20 di mart ku un seremonia ofisial ‘Louis Roederer Champagne Reception’ kual lo tuma lugá na Curaçao Marriott Beach Resort entre 6:30pm i 8:30pm. Djasabra 21 di mart ta duna inisio na e torneo di gòlf, esaki pa 12:00pm. Durante di e torneo lo tin un delisioso BBQ na Blue Bay Club House for di 6:30pm. Ta bon pa menshoná ku e kompetensia di gòlf aki ta habrí pa hungadónan di gòlf di tur nivel i ta kosta Naf. 179,- pa inskripshon ku ta inkluí; akseso na seremonia ofisial ‘Louis Roederer Champagne Reception’, ‘lunch box’ i kos di bebe riba kancha, ‘green fee’ i balanan di gòlf, polo shirt di e torneo (Nike Dry Fit), oportunidat di gana 2 ‘Hole-in-one’ i akseso na e ‘BBQ Awards Dinner’ inkluyendo bebida. Premionan grandi di e kompetensia aki pa e ‘Hole 5’ lo ta un BMW X4 i pa e ‘Hole 13’ lo ta un Mini Cooper. Un danki na tur spònser ku ta hasi e torneo aki posibel: BMW, NetPro Group & Inova Solutions, Licores Maduro, Wasserij Kòrsou, The Wine Factory, EWT, Digicel i National Car Rental. Kòrsou ta keda invitá pa un tremendo kompetensia di gòlf i na mesun momentu ta yuda Stichting Shimaruku Curaçao. Pa registrá bishitá www.golf.bluebay-curacao.com/marriott