E aña aki e golfistanan maskulino ta bai haña bastante trabou, ku presensia di kuater golfista femenino di nivel haltu: Melissa Mabanta, Maiya Tanaka, Selanee Henderson i Brooke Baker. Pa di tres edishon sigui, Curaçao Masters ta promove talentonan femenino durante di e evento di golf di mas grandi ku Korsou konosé.
Lady Golf
Tur e kuater golfistanan femenino aki ta aktivo den e “Symentra Tour”, kual ta e kompetensha kualifikatorio pa e famoso LPGA Tour. Ademas Tanaka i Henderson a figura den e popular serie di programa di reality di Golf Channel “The Big Break”. Ta den e Tour ku nan ta hunga ta sali e streanan mundial di mañan di LPGA.
North and South Americans
Ademas di e kuater damitanan aki e organisashon ta duna bonbini na e prome ganador di e grandioso torneo aki, Peter Horribin di Jamaica i Samuel Kemp ku lo defende e kolonan di Bahamas. For di Venezuela por konta ku presensia di algun eks-kampeon: Otto Solis ku a gana na 2009 i 2015, Miguel Martinez (2008 & 2011) i Juan Berastegui.
Algun di e karanan konosí ku lo tey atrobe ta e golfistanan Merikano Cameron Booth (ganador di 2013), Michael Tobiason i Stuart Gold. E profeshonalnan di Canada e biaha aki, Andrew Jensen, Justion Reigier i Danny King, lo kompaña e ekipo amateur di golf “National Homes”. Pa korona, Canadian Junior Golf Association (CJGA) lo delegá e tres promenan di nan “Ordu di Merito Nashonal” pa kompeti den Curaçao Masters. E amateurnan ku lo yama atenshon taTy Celone (16 aña) Sean Trapp (17) I Thomas Giroux (17) lo hunga komo un ekipo di CJGA den e torneo, mientras ku nan partisipa tambe pa buska e titulo di kampeon amateur.
Europa
Pa loke ta e contingente europeo, nan lo tin representashon di diesun (11) golfista. Ademas di Robert Jan Derksen, Hulanda lo ta aki ku e dos biaha kampeon Ralph Miller (2012-2014) huntu ku Ben Collier i Ruben Wechgelaer. Hungadornan di Tour Aleman manera Cristoph Gunter, Peter Nickel, Sebastian Buhl i Dennis Kupper lo ta presente. Aña pasá Buhl mester a kontenta su mes ku e di dos luga. Gunther di otro un banda ta den gran forma. Ela kaba di gana e World Pro Am na Durban, Sur Afrika.. For di Inglatera lo bini e ya bon konosí di Korsou, Paul Simpson i Daniel Poulter. Tantu Simpson komo Poulter ya ta versá komo profeshonal i rutiná ku e eventonan tipo Pro-Am. Daniel Poulter mientras tantu ta trahando duru pa rekobrá su karchi di European Tour. Fredrik Quicker di Suesia ta konosi komo e homber di e bala largu. E ta konektá nan hopi leu..
Blue Bay ta realmente honrá ku presensia di e top golfistanan internashonal aki. For di dia 7 di April lo por mira nan den akshon aki na Korsou, mientras ku e final ta ranka sali dia 9 di April,2or di merdia, na Blue Bay Golf. Ademas di disfruta di golf na nivel haltísimo, lo trit e bishitantenan riba diferente entretenimiento di golf. Pa muchanan tambe lo tin diferente aktividat atraktivo. Entrada pa e dia di famia aki ta gratis. Tira un bista riba www.curacaomasters.com I www.facebook.com/bluebaygolf pa mas informashon.