Determinashon i kreatividat di staf i personal hungando un papel grandi

Djamars 22 di mei tabata un dia sumamente importante pa Curaçao Zoo & Botanical Garden; riba e dia aki a tene un konferensha di prensa ku e meta pa informá komunidat di tur loke ku ta pasando den nos parke, laga un i tur komprondé unda ta kuné aworaki i tambe informá di un evento grandi pa rekoudá fondo ku lo tuma lugá próksimamente.

Pa último 6 añanan, Curaçao Zoo a bin ta pasa den un proseso di renobashon; ya pa un tempu kaba, e parke ta pa gran parti será pa públiko pa motibu di rekonstrukshon ku mester tuma lugá pero ku falta di fondo tabatin wantá; no opstante esaki, e parke ta konta ku 464 bestia repartí den 63 diferente sorto! E area ku ta habrí tur dia, ta e ‘petting zoo’.

E situashon di Curaçao Zoo no ta fasil, sigur mirando e situashon finansiero di pais, pero ku determinashon, kreatividat i ku ayudo di algun kompania i miembronan di nos komunidat, ta trahando hopi duru pa por yega na e parke di bestia ku nos tur komo yu di Kòrsou por ta orguyoso di dje.

Na e momentunan aki, Curaçao Zoo ta hañando bon koperashon di Ministerio di Salubridat, Medio ambiente i Naturalesa. Riba esaki, sr. Alvin Daal, ‘kabinetschef’ di Minister di Ministerio di Salubridat, Medio ambiente i Naturalesa a amplia: ”Alrededor di 1 aña pasá a sera konosí ku e reto ku yama Curaçao Zoo dor di tende e director ta pidi yudansa den media. E kabinete en kuestion a haña splikashon di e situashon, a mira e parke i e grupo di hende ku praktikamente ta hasiendo milager pa por mantené e parke na bida. Ku e konfrontashon ei i sabiendo e funshon di un parke di bestia den entre otro edukashon di nos hendenan den nos komunidat, a bisa ku mester wak pa remediá e problema di falta di supsisio.

Despues di hopi, a logra pa kombiná ayudo di sektor privá ku e parke tin kaba ku ministerio di hustisia, ku tin un forsa laboral di 400 persona den SDKK ku tin gana di traha i a yega na un kombenio pa bai yuda drecha parke”.

Mas aleu sr. Daal a bisa di ta konsiente ku no por logra tur kos a korto plaso, pero ta bai duna inisio na e trabounan. Aworaki ta den fase di preparashon pa e trabounan di e promé fase kuminsá.

Sr. Axel Pikero, kolabradó di e kabinete di Ministerio di Salubridat, Medio ambiente i Naturalesa a suprayá e konvikshon, e amor i forsa ku e direktor aktual di Curaçao Zoo i su tim ta hinka tur dia di nobo den e parke, konfrontando hopi reto, loke ku ta algu di aploudi. Netamente esaki ta loke ku ta inspirá e ministerio pa hasi tur posibel pa yuda e parke. El a bisa mas aleu ku mirando varios proyekto ku tin pendiente pa e parke, e ta sumamante orguyoso di e vishon ku Isenia i ta hasi un apelashon na komunidat pa aportá na nos Curaçao Zoo.

Curaçaose Wegenbouw Maatschappij(CWM), representá pa señora Caresse Josepha, Beton Industrie Brievengat i Mijnmaatschappij, representá pa sra. Jamie Waas, tambe a reafirmá nan kontribushon na Curaçao Zoo, kua kuminsá 5 aña pasá ku slebrashon di 60 aña di CWM komo un gesto pa duna bèk na komunidat.

Aparte di kompanianan privá ku ta aportána e parke, Curaçao Zoo ta hasi diferente proyekto pa yega na fondo. Un di nan ta e askhon di ‘standing order’ ku tin ya un par di aña na vigor. Próksimamente lo bai intensivá e akshon aki, pa por yega na un kantidat máksimo di habitante ku ta kontribuí ku un mínimo di fl. 5,- mensual, Karga di tur kunuku te yena Punda!

Direktor di Curaçao Zoo, sr. Hubèrt Isenia, a duna un bista mas aleu di algun punto di atenshon pa ku e parke:

• Ta traha ku Servisio Veterinario, kendenan ta kere den e trayekto ku Curaçao Zoo ta siguiendo
• Interkambio di bestia

Dos siman pasá direktor di parke di bestia na Trinidad & Tobago tabata di bishita pa un interkambio di bestia ku lo bai tuma lugá a korto plaso.

• Importashon di bestia

Pa nos por haña e bestianan di afó, tantu di interkambio òf simplemente importashon, lo mester terminá e promé fase, loke lo kuminsá próksimamente. Ya na 2015 durante di su fiesta anual, Curaçao Lions Club a rekoudá fondo pa Curaçao Zoo destiná pa importashon di bestia, loke ku tambe lo sigui na momentu ku terminá e promé fase.

• Koperashon ku AZA, Association of Zoos and Aquariums

No ta fasil pa ta miembro di e organisashon menshoná pero miembronan di direktiva ta birando miembro individual komo ku no tin un identidat registrá den regio ku ta miembro kaba. Na sèptèmber próksimo lo biaha pa e konferensha anual na Seattle.

• San Diego Global

A logra un akuerdo di koperashon ku San Diego Global, kua ta un organisashon patrosiná pa San Diego Zoo kaminda ku tin hopi aktividat i ta traha ku entre otro Ronald Mac Donald House Charities, loke ku pronto lo duna mas informashon di dje.

Pa loke ta e koperashon mes, esaki ta mará na dunamentu di konosementu na personal kaminda ku nos staf lokal lo bishitá Merka den 2019 komo i nos lo haña personal di e parkenan ku lo bin bishitá nos, loke lo kontribuí na ampliashon di nos konosementu

• Curaçao Zoo ta fungi tambe komo un ‘rescue center’, kaminda ku diferente bestia entre otro konfiská òf maltratá ta keda tresé na parke

Curaçao Zoo ta gradisi un i tur ku di un òf otro forma ta koperando kuné. Riba medionan sosial di Curaçao Zoo por sigui tur desaroyo. Ban uni pa hasi nos parke un éksito rotundo.