Awe djamars 11 di yüni 2013, Parlamento a trata durante un Reunion di Komishon Sentral e promé presupuesto supletorio pa aña di servisio 2013.

Reunion di Komishon Sentral, ku ta wòrdu konsiderá komo un reunion tékniko kaminda  aspektonan tékniko ta wòrdu tratá. Esaki ta eksaktamente lokual ku MFK a bin pa hasi awe den sala di Parlamento; hasi preguntanan alkaso na Gobièrnu di Kòrsou, sin hasi polítika. Preguntanan serio pa haña klaridat promé ku bai ofer pa tratamentu di e presupuesto supletorio 2013 den un Reunion Públiko.

Frakshon di MFK, atraves di Parlamentario sr. Amérigo Thodé a remarká durante e reunion ku Parlamento ta tratando un presupuesto di 1700 mion florin di nos pais sin ku Gobièrnu, sostené pa e “koalishon di 11” den Parlamento, despues di 6 luna tin un Programa di Gobernashon. Sr. Amérigo a dirigí su mes na Presidente di Parlamento sr. Mike Franco i a indiká ku ta imposibel ku ta tratando un presupuesto supletorio sin un maneho pa ku esaki. Ku “maneho” sr. Thodé ta aludí naturalmente na un Programa di Gobernashon.

Na total sr. Amérigo Thodé a hasi 31 pregunta na Gobièrnu ku ta di sumo importansha pa Frakshon di MFK, pa asina e sinku Parlamentarionan di MFK por prepará nan mes pa e Reunion Públiko ku lo sigui riba un término kòrtiku. Pa e motibu aki Frakshon di MFK ta spera ku Gobièrnu lo kontestá tur e preguntanan ku a wòrdu hasí awe ku dedikashon pa asina esakinan no mester wòrdu ripití atrobe durante e Reunion Públiko kaminda lo bai trata e presupuesto supletorio 2013.