Ta reuniendo continuamente cu gremionan pa yega na e miho producto di ley

Minister Oduber recientemente a topa cu prensa pa asina un biaha mas splica un poco mas riba e contenido di e ley di “All-inclusive” cu dentro di poco lo keda trata den Parlamento. E mandatario ta indica di ta na altura cu tin un interpretacion robes. “Tin hende ta bisa cu minister kier tin poder.” Sr. Oduber ta comenta. E ta splica cu na prome luga den e cambio di ley ta stipula un periodo di 20 aña pa renoba permiso di hotel. “E minister aki no ta bay t’ey aki 20 aña. Kiermen mi no por ta creando ningun poder pa mi.” Minister Oduber semper a mira e interes general di pais Aruba. E mandatario ta sigui splica cu a base di hurisprudencia general di Hof Europeo cu ta papia di permisonan ‘schaars’, cu ta permisonan cu no ta regularmente ta wordo otorga, mester mara esaki na un tempo defini. Permisonan di hotel ta cay netamente den e categoria aki mirando cu kier solamente un cierto cantidad y lo no kier pa e inventario crece hopi mas.  Hof Europeo ta papia di 5 aña. Gobierno di Aruba kier garantisa inversion y stabilidad di companianan, y a bay mas leu cu e 5 añanan stipula y como tal a  mara e permisonan pa hotel na 20 aña.  Minister Oduber ta habri pa dialogo y lo por te hasta aumenta e cantidad di aña stipula si mester haci esaki. “Si kier bay na 25 of 30 aña mes no ta nada nos por papia riba esaki. Si mester adapta cierto puntonan den e ley cu ta trece garantia, nos lo hacie. Mester stipula cierto criteria cu bo ta aproba of desaproba e permisonan. No por ta asina cu e ta keda na discrecion di e Minister na mando pa tuma un decision basa riba opinion personal. E ley t’ey pa mara un decision asina importante na cierto criterianan. Y esaki lo conta pa ken sea ta e minister of e hotel of e inversionista na e momento ey, basta cu ta cumpli cu e condicionnan mara den e ley.” Ta un situacion similar cu esun di erfpacht unda un persona despues di 60 aña mester renoba esaki, pues e no ta un practica desconoci riba nos isla.

Un otro punto cu Minister Otmar Oduber a toca ta e insinuacionnan cu su persona lo kier dicidi con e hotelnan tin cu haci nan negoshi. E mandatario ta splica cu a sinta hunto cu AHATA, unda e organisacion cu ta representa mayoria hotel riba nos isla mes a bin cu e proposicion di e situacion actual, unda cu hotelnan ta uza entre 20% cu 10% di nan inventario di camber pa paketenan di All-inclusive,  unda Gobierno a dicidi di tuma e cantidad maximo cual ta e 20% pa stipula den e ley. “Ademas di esey nos a pone dos excepcion den e ley cu ta permiti tur locual ta MICE, convencionan, tur conferencianan ta ilimita riba e 20%.” E excepcion riba e ley aki a keda stipula como cu durante un dialogo entre AHATA y Minister Oduber esaki a keda treci padilanti. Adicional na e excepcion di MICE ta pone un articulo mas unda si ta premira cu e luna siguiente, e hotel ta menos bon para compara cu e mesun temporada e aña anterior,  tambe lo ta un motibo pa haya un excepcion riba e 20% pa e hotel lo por haya benta pa su cambernan den e modelo di All-inclusive.

Locual e ley kier evita ta cu hotelnan existente ta wordo bendi cu cadenanan di All-inclusive cu kier bin opera 100%. Bula di un 20% cu ta parti di un combinacion cu cambernan EP pa un 100% den e modelo All-inclusive. Esey ta locual e ley aki kier frena y evita. E bibo ehempel cu Aruba a experiencia unda 3 di e 4 resortnan cu a keda bendi a transforma den 100% All-inclusive,  como cu no tabata tin leynan pa permisonan existente y cu por a frena e tipo di negoshi aki. “Tipo di negoshinan asina aki ta pa interes personal, interes particular di e doño di e resort of propiedad pero e no ta na interes general di Pais Aruba.”

Ta reuniendo continuamente cu gremionan pa yega na e miho producto di ley. Ta spera cu prome cu reces trata e ley aki den Parlamento.