Willemstad- Salubridat ta forma un parti esensial di Girobank su responsabilidat sosial korporativo. Girobank ta konvensí ku un komunidat ku ta hiba un estilo di bida saludabel lo kontribuí no solamente na benefisio personal pero tambe na e benefisio general di e pais. Manera ya ta konosí Girobank pa algun aña kaba a bin ta duna sosten na nos Banko di Sanger komo rekonosimentu pa e gran labor ku nan a bin ta ehersé. Banko di Sanger ta dependé kompletamente riba voluntarionan ku ta duna nan sanger i asina yuda salba bida di otro. Den e proseso aki tin aktor- i faktornan masha importante pa por hasi e proseso aki posibel. Por ehèmpel e stulnan ku ta keda usá diariamente pa por sinta i duna sanger. Atraves di añanan ta hopi donante a hasi uso di e stulnan aki i nan edat a kuminsá bira visibel. Pa por sigui sirbi nan propósito nan mester a haña un bachi nobo. Ku e echo aki na bista Girobank a otorgá 6 stul kompletamente re-modelá na Banko di Sanger. Pa por visualisá balor di e trabou di Banko di Sanger, i e ròl ku kada donante ta okupá den e trayekto aki, Girobank a skohe pa traha un spòt di televishon pa Banko di Sanger. E spòt tin komo meta prinsipal pa konsientisá pueblo di Kòrsou riba e importansia di por bira un donante i alabes pa stimulá kada persona ku ainda no ta un donante pa por kontemplá e posibilidat aki. Hasiendo esaki bo ta kontribuí huntu ku Banko di Sanger na e kousa noble aki pa sigui salba bida. Ku e spòt, Girobank ta spera di por duna un aporte di kua su balor ta di tèrmino largu. Aparte di hasi donashon den forma tangibel i visibel, Girobank ta bai yuda Banko di Sanger rekrutá donante den un forma konkreto. Pa alkansá e meta aki Girobank ta habri e oportunidat pa su empleadonan ku ainda no ta donante por bai hasi e eksamen nan médiko nesesario pa por bira donante, durante di ora di trabou. Esaki outomátikamente lo yuda enrikesé e base di voluntario di Banko di Sanger. Pa mas informashon bishita e página di ‘Facebook’ di Banko di Sanger www.facebook.com/StichtingRodeKruisBloedankCuracao