Willemstad – Durante un enkuentro ameno, Girobank a anunsiá i ofisialisá su aporte na Parada di Hubentut 2015. Ku esaki Girobank ta afirmá su kompromiso ku nos komunidat. Den su afan pa sostené e área di arte & kultura bou di hubentut, Girobank a uni su mes un biaha mas ku e gruponan partisipante na e parada di hubentut, konhuntamente ku MEO i AGKK. E Parada di Hubentut lo tuma lugá dia 13 di febrüari próksimo. Esaki ta e parada kaminda hóben nan ta mustra na kreatividat, entusiasmo i dinamismo. Gruponan partisipante huntu ku nan lider nan ta hinka hopi tempu, dedikashon i esfuerso pa presentá un produkto final bunita kombiná ku un tremendo koreografia na pueblo di Kòrsou. E aña aki e marcha lo konsistí di 14 grupo ku ta bai lusi riba ruta di karnaval. Girobank komo ‘branding partner’ ke duna un estímulo i empuhe na nos hóbennan ku ta partisipá na e parada aki, mirando ku parada di hubentut ta un di e marchanan hopi importante ku ta yuda forma e totalidat di e temporada di karnaval i tambe basá riba e hecho ku ta nos hóben nan tin ku bai sigui karga e evento kultural aki.
Ku e kontribushon aki Girobank ta spera na engrandesé nos Parada di Hubentut i sigui ta komprometé ku arte i kultura.