Raad van Toezicht di hospital ta confirma

ORANJESTAD, Aruba – 16 di november 2015: Siguiendo cu e liña di maneho di e Raad van Toezicht anterior di Hospital y e conseho di un rapport traha pa un profesor, e Raad van Toezicht nobo di Dr. Horacio E. Oduber Hospitaal pa e ultimo shete lunanan hunto cu KPMG Corsou a cana e proceso pa recluta un di tres director pa hospital. E intencion tabata pa banda di e Director financiero Drs. Theo de Kool RA y e Director di cuido di pashent Ezzard Cilie, pa bin tambe cu un Director general. Entretanto a extende e contract di Ezzard Cilie tambe. Recientemente e Presidente di e Hunta di Supervision di Dr. Horacio E. Oduber Hospitaal, Gino Goeloe, a anuncia cu, despues cu negociacionnan cu e ultimo di e tres candidatonan cu a solicita pa bira Director general a pega, nan a dicidi cu no lo sigui cu e proceso. Negociacionnan a pega na e condicionnan di trabao, el a confirma. Por lo pronto Hospital lo keda cu e dos directornan actual, esta De Kool y Cilie, y no lo haci intentonan pa busca un di tres director tampoco. Goeloe a splica cu e actual Raad van Toezicht tin un aña den funcion y nan experiencia cu e dos directornan ta bon, tin hopi cos positivo pasando na hospital, cambionan grandi ta tumando luga caba y tin mas na caminda.

El a menciona entre otro e construccion di hospital cu ta bin cla otro aña, e implementacion di e sistema electronico pa dossiernan di pashent y JCI, cual ta e acreditacion di hospital. Tin mas proyecto pa futuro cu ta den diferente fase y Raad van Toezicht a ripara cu cosnan ta bayendo hopi bon cu e dos directornan actual, nan ta contento cu nan y a dicidi cu pa e proximo añanan hospital lo keda cu dos director, Goeloe a splica. E porta ta cera por lo pronto pa solicitud nobo tambe, el a agrega. A funda Dr. Horacio E. Oduber na aña 1976 y a dedica su nomber na e prome dokter Arubiano. Cu mas di 1000 empleado trahando diariamente pa atende e mas di 16.000 pashentnan pa aña, Hospital ta conta cu 320 cama y ta brinda un variedad grandi di servicio medico na nos comunidad y na turistanan. Pa por eherce tur e intervencionnan medico aki, Hospital ta conta cu un centro di rehabilitacion, un centro di terapia fisico, un departamento di emergencia, wondenpoli, diabetes center, pain clinic, oncologia day-care unit, 5 sala di operacion, Intensive Care Unit y asina por sigui menciona. Aña pasa a inicia un trayecto di 4 aña di construccion di un edificio nobo cu lo bay conecta cu esun existente, cu tambe lo conoce un renobacion completo. Na final di e proyecto, Hospital lo por brinda mas y miho cuido na pashentnan.