Showbizz International ta anunsiá su promé 2 artistanan
WILLEMSTAD; Ku hopi orguyo Showbizz International ta anunsiá nan promé dos artistanan pa e festival. Gente De Zona i Elvis Crespo ta forma parti di line-up di ‘Viva 2016’. Gente De Zona,ta e grupo latino di momento! E fushon di sabornan kubano/ reggaetòn ku a originá na aña 2000 dor di su fundador Alexander Delgado e aña aki a wòrdu galardoná ku 2 premio Latin AMAs komo e grupo mas sobresaliente i e otro pa e kansion tropikal faborito di aña. Miembronan di e grupo Alexander Delgado, Randy Malcom Martinez, Jacob Forever, Nando Pro, Michel Delgado ta pèrkurá pa e grupo figurá entre e faboritonan pa un públiko di tur edat. Durante e fin di siman dia 3 i 4 di yüni, 2016 ta primintí “Gosadera” total, sigur momentu ku e hit di 2015, keda interpretá riba esenario durante ‘Viva 2016’. Na 2014, Gente De Zona a djòin Enrique Iglesias i Descemer Bueno pa produsí e hit, ”Bailando” i mas o ménos 8 luna pasá ta bolbe djòin otro mega artista, Pitbull pa produsí “Piensas”. Gente De Zona ku diferente number 1 riba kartelera musikal internashonal Billboard, definitivamente ta é grupo latino mas solisitá aktualmente!
Elvis Crespo , no ta deskonosí- e’la kaba di duna un presentashon elektrisante na Aruba. E regreso di Elvis Crespo despues di 5 aña na Kòrsou lo ta mas mihó ku nunka. E ganador di 12 premio Lo Nuestro, 2 premio Grammy Latino lo tei pa interpretá tur su hitnan un tras di otro. Durante di e aña aki, Crespo su hit ‘Tatuaje’ huntu ku Bachata Heights a demostrá ku e ta un artista ku por laga públiko disfrutá di diferente género musikal latino. Esaki ta eksaktamente loke ta bai haña tambe. Huntu ku su hitnan, Suavemente, Píntame, Tu Sonrisa, Nuestra Canción i mas Crespo lo zona, bachata, latin pop, reggaetòn i muchu mas p’asina krea un ambiente total durante di ‘Viva 2016’.
E di dos edishon pa Viva La Música Latina Curaçao, ta dianan 3 i 4 di yüni, 2016 na sitio di parkeo di Sambil. Por sigui e página di Facebook di Viva La Música Latina Curaçao pa keda informá. Pronto lo publiká mas detaye di benta di karchi pa e festival ku e aña aki ta primintí di bira un fiesta total!