Willemstad – Djasabra 4 di Mei lo tuma lugá un gran evento pa públiko na Aeropuerto di Kòrsou yená ku aktividat pa henter komunidat i amante di aviashon. Lo tin airshow, tour ku ta ofresé un bista tras di kòrtina na aeropuerto, Aviation Kidscorner ku entretenimiento pa mucha, muzik live di banda i DJ renombrá, show di baile i hopi sorpresa mas. Registrá pa e kaminata riba pista ‘Run the Runway’ i pa tour di e terminal di aeropuerto via website www.curacao-airport.com.


Curaçao Airport Partners i Curaçao Airport Holding ta invitá Pueblo di Kòrsou pa bin selebrá e inougurashon ofishal di e areanan nobo na Aeropuerto pa medio di e evento ‘GATE10-Gateway to the World!’. Komunidat di aeropuerto ta orguyoso i ke presentá e resultado di e inmenso trabou i esfuerso invertí na realse di nos aeropuerto i den e eksperensia di e bishitante. Dia 4 di Mei Curaçao International Airport lo transformá den un mundu mágiko di aviashon ku un gran kantidat di aktividat pa henter famia i pa tur esnan ku tambe ta orguyoso di e ‘look’ nobo di Kòrsou su aeropuerto.

Registrashon
E dia habrí ta inisiá mainta trempan ku ‘Run the Runway’, e promé kaminata den Karibe ku ta tuma lugá riba pista di aeropuerto, un eksperensia ùniko! Durante dia lo tin tour di e terminal nobo kaminda lo introdusí tur e fasilidatnan i areanan nobo na aeropuerto i kaminda lo por mira avionan di’aserka. Tambe Curaçao International Airport lo inougurá e ‘Mirador’ nobo i habri esaki ofishalmente pa komunidat. Entrada pa ‘GATE10-Gateway to the World’ ta grátis. Registrashon pa ‘Run the Runway’ (ANG35) i pa e tour di aeropuerto (gratis) ta online via www.curacao-airport.com of página di Facebook Curaçao International Airport.