E seis hobennan ganador di Curaçao Baseball Week 2015 den e fin di siman ku a pasa a presensia e loke nan tabata pendiente di dje;, e wega di MLB entre Miami Marlins i San Francisco. Givian Sirvania, Deshandro Tromp, Jurrangelo Cijntje, Randy Nicia, Mitchelson Danchi i Riorden Windster a bula ku Partner Insel Air pa Miami pa mira e streanan mas grandi di beisbol den akshon.
Djasabra ultimo e hobennan, akompañá pa un mayor, e organisashon i sobra miembronan di e delegashon a registra na Sheraton Airport Hotel. Den oranan I anochi nan a bai disfruta konhuntamente di un sena den sentro di e siudat. E salida huntu tabata fenomenal for di kuminsamentu loke a perkura pa un tremendo ambiente familiar.
Djaluna anochi e delegashon a keda risibi na e entrada di Media pa e ‘Manager Guest Services’ Cristina Corpion di Marlins. Bou di direkshon di Christina tur hende por a realisa un rekorido den hinter e stadion. Nan a bishita tur e areanan ku ta bale la pena konosé, di ariba te abou. Despues di esei e grupo a keda risibi riba e tereno di wega pa nos Hensley ‘BAM BAM’ Meulens! Tantu e warm-up i e ‘batting-practice’ di tantu Marlinskomos Giants, tur hende por a sigui di aserka. Tabata un tremendo oportunidat pa nan haña firma i duna un man na e peloteronan.grandi di Giants manera Pence, Pagan i Crawford. Berdaderamente un eksperensha formal pa e hobennan, nan mayornan i e organisashon.
E partido mes tabatin algun momento espektakular ora ku hungadornan di Marlins Prado i Yelich a konekta “back to back” batasonan formal ku a bai di homerun. Finalmente Giants a bin gana den 14 inning, 8-7. Despues di pasa e anochi den hotel e seis pupilonan a regresa Korsou satisfecho di loke nan a eksperenshá. Sigur ta ku nan a siña masha hopi loke por yuda nan futuro den e deporte di beisbol.
E proksimo Curacao Baseball Week ta tuma lugá di 25 di November pa 2 di Desember 2016. Organisador principal Blue Bay Resort I ko organisadornan Hensley Meulens i Ben Thijssen, pronto lo duna mas detaye riba e gran fiesta aki di beisbol.