Djadumingu dia 31 di ougùstùs próksimo, Hacienda Alegria ta organisá un tremendo ‘Cabalgata’ pa rekoudá fondo pa representantenan ku lo kompetí na Interpaso Aruba den luna di Sèptèmber. E ‘Cabalgata’ ta sali 1.30 p.m. na Plantage Sta.Cruz i ta tèrminá na Hofi Lagun. For di 12 or tin bendementu di kuminda krioyo i kos di bebe. Tambe lo tin animashon musikal. Den luna di yüli ku a pasa, un delegashon di 29 kabayista a representá Kòrsou di un forma estupendo durante e di 10 ‘Mundial de Jinetes y Amazonas’ na Pereira Colombia. 3 representante a kai den premio den kua  representante di Hacienda Alegria, Frengeli Hooi huntu ku su trainer Frenshelo Hooi, a partisipá pa promé bia den e kompetensia aki i a sali na di 5 lugá. Esaki ta un estímulo grandi pa e hóbennan aki i pa e motibu ei, nan ke sigui profeshonalisá nan mes i prepará pa kompetensianan ku tin den futuro. Hacienda Alegria ker a invitá tur kabayista ku ta gusta e ambiente úniko na Banda Bou, pa partisipá na e ‘Cabalgata’ aki. Hacienda Alegria ta warda tur esnan ku ta gusta e ambiente di ‘Cabalgata’ i tambe un bon kuminda krioyo bin disfrutá di e aktividat aki i alabes kontribuí ku un bon kousa.