Durante un enkuentro hopi animá, Fundashon ROSA, e organisashon di Pashèntnan di STOMA a inougurá nan sentro di kliente situá na Scharlooweg 23. A tuma Fundashon ROSA hopi tempu i diferente mudansa di un lokalidat pa otro, pero porfin nan tin nan propio kas. Fundashon ROSA a keda fundá na 1989 dor di dòkter Sexto Sillé huntu ku algun profeshonal den kuido, ku e meta pa duna sosten, yudansa i guia na personanan ku a risibí un STOMA.

Kiko ta un STOMA?

STOMA ta palabra Griego ku ta nifiká: boka.  Simplemente bisá, un STOMA ta un salida artifisial pafó di barika pa kolektá sushi i/òf orina. Ta un operashon ku ta ser realisá serka personanan, ku pa motibu di  kanser, polip, un infekshon króniko na tripa òf dor di un fayo di nasementu mester kita parti di nan tripa. Den e kaso aki ta traha un salida artifisial pa kolektá e sushi i/òf orina pafó di e barika.  Un STOMA por ta algu temporal òf permanente. Nos konosé 4 tipo di STOMA. ILEOSTOMA,  ku ta  un salida artifisial na e tripa fini òf tripa delegá, COLOSTOMA ku ta un salida artifisial di e tripa diki. UROSTOMA ku ta un salida artifisial di e blas di    orina. Tracheostoma ku ta un salida artifisial na garganta di un persona pa yud’é hala rosea. “Ku atkisishon di e lokalidat aki, awe Fundashon ROSA a drenta un era nobo”, señora Cecilia Lai Booi, presidente di Fundashon ROSA a deklará. “Danki na Wit Gele Kruis i Thuiszorg Bandabou, kuminsando 1 di novèmber 2013, un biaha pa siman, tur djamars di 2.30’or pa 4.30’or di atardi nos tin un konsulta habrí ku un enfermero speshalisá den STOMA pa atendé tur pashènt di STOMA i nan famia. Tambe tur djaweps di 9’or di mainta pa 12’or di mèrdia nos tin un mainta di informashon ku un enfermero speshalisá tambe pa duna informashon i pa kontestá kualke pregunta ku un kliente òf su famia por tin tokante STOMA. Anto tur djaluna di 9’or di mainta pa 12’or di mèrdia nos tin un mainta di terapia, kaminda ta siña nos klientenan traha obra di man. Pues nos ta felis i kontentu ku awor nos por brinda nos klientenan muchu mas servisio den nos edifisio nobo”.

Kasonan di STOMA

Na mundu tin mas o ménos 1.3 mion di persona ta kana rònt ku un STOMA. Na Hulanda tin alrededor di 30.000 kaso i na Kòrsou tambe e kantidat di pashènt ku un STOMA ta hopi. Segun señora Booi, Presidente di Fundashon ROSA, e no por bisa ku eksaktitut kuantu pashènt di STOMA tin na Kòrsou. Na e momentu aki nan tin mas o ménos 50 kliente registrá serka, pero e kantidat ta hopi mas tantu. Ta un hecho, ku e pashèntnan di STOMA ta birando kada dia mas hopi na Kòrsou. Segun informashon pa luna ta bin mas o ménos 10 pa 12 kaso di STOMA aserka. Segun señora Booi, no ta tur ora nan sa di e kasonan di STOMA, di moda ku nan por bishitá e pashèntnan pa duna nan e sosten, apoyo i guia nesesario.  Realidat ta, ku tin un grupo grandi di pashènt, ku no ta haña e guia ni promé ni despues di operashon. “Nos di ROSA ta keda persistí riba e importansha pa duna guia i informashon na un pashènt durante e proseso pa haña STOMA. E mundu ku e pashènt ta bai hañ’é aden ta difísil i duru i e mester ta bon prepará p’e. Ta p’esei informashon promé ku operashon ta di sumo importansha”, señora Booi a bisa. “No tin nada mas mihó pa bo tin un grupo di sosten ku ta den mesun situashon ku bo i ku bo por yega papia ku n’e. Ta p’esei nos tin nos enkuentronan durante kua tin posibilidat pa tur hende por papia ku otro. Nan tambe ta den mesun situashon ku abo ta den, i ku segun tempu nan a siña biba ku un STOMA”. Durante e reunionnan ku Fundashon Rosa ta tene ku su miembronan, nan  ta interkambiá di eksperiensha ku otro i duna otro konseho, ya ku nan ta komprondé i sa kiko nan komo pashènt di STOMA i nan famia ta pasa aden.  Pues nan por komprondé i sa di e duda, miedu i  tambe inseguridat ku un pashènt  por tin di un STOMA.  Ta p’esei Presidente di Fundashon ROSA ta urgí dòkternan di kas, speshalista i siruhanonan, pa nan manda nan pashènt ku ta bai risibí un STOMA, òf pa nan pidi e pashèntnan aki pa drenta den kontakto ku Fundashon ROSA pa nan por risibí e guia nesesario. Mas mihó prepará e pashènt i su famia ta, mas mihó e por akseptá e STOMA tambe. Ta na benefisio di e pashènt mes. Na final señora Booi, tantu na nòmber di pashèntnan di Stoma komo di komunidat a gradisí tantu Fundashon Un Dushi Rekuerdo, tantu señor Lio i Chicu Capriles pa nan kontribushon na e organisashon di Pashèntnan ku STOMA, dor di pone e kas aki na disposishon di Fundashon ROSA sin kosto algun. Pa kualke informashon tokante Fundashon ROSA por tuma kontakto ku telefòn 562-8738 òf 566-1928 òf via di mail stomaverenigingrosa@gmail.com.