Djasabra 9 di mei 2015 último, Fundashon ROSA, e organisashon di pashèntnan di STOMA di Kòrsou, a organisá un interesante simposio durante kua a trata e tema di STOMA.  Tema di e simposio tabata “Na Kaminda pa un Bida Nobo”. Konsiderando e kantidat di kasonan kresiente den nos komunidat kaminda mester pone un STOMA serka un persona, Fundashon ROSA a mira e nesesidat pa organisá e simposio aki, no solamente pa konsientisá nos komunidat riba e partikularidat aki, pero alabes pa traha riba prevenshon pa redusí kasonan di STOMA den nos komunidat, alabes pa krea konsiensia serka komunidat, ku un STOMA ta nifiká un di dos chèns di bida serka un persona. Durante e simposio aki diferente speshalista a hiba palabrá entre otro dr. Kenneth O’Niel komo dokter di kas, Dr. Raudwyn Schotborgh, Gastroenterólogo, Dr. Patrick Fasioen, Siruhano i Dr. Gerold Rach, Speshalista/Siruhano riba tereno di KNO. Tambe a hibapalabra zr. Evelyn van Herwijnen i  zr. Etlyn Ogenio, Stomaverpleegkundige i señora Sherryl Coffie, Trahado Soshal. Banda di e presentashonnan aki tambe tabatin diferente testimonio di entre otro Cecilia Lai Booi, Guensly Cristina i Edisona de Bruijn-Ignacio. Komo oradó invitá e dia aki a konta ku presensia di señor Carlos Faarup kende ta miembro di direktiva di Federacion FORSA, e Organisashon di Pashèntnan di STOMA di Aruba, ku tambe a duna su testimonio i alabes splika kon e situashon di pashèntnan di STOMA ta na Aruba. E simposio a konta ku un sala yen, kua ta demostrá e interesgrandi ku tin den komunidat pa tipo di informashonnan manera esaki. Fundashon ROSA ke gradisi iun i tur pa nan aporte.