Fundashon Pro Bista ta un instansia parsialmente supsidiá ku e meta pa integrá personanan sin bista i esnan ku limitashon visual den nos komunidat i krea asina mihó kondishonnan di bibá i di bida  pa e grupo aki. Fundashon Pro Bista ta organisá anual mente nan Luna di Buzon, p’asina yega na fondo pa realisá diferente proyekto pa su klientenan. E aña aki, Fundashon Pro Bista ta kumpli 15 aña i nan ke pone énfasis riba esaki. Den e 15 aña nan ku a pasa, nan a logra yega na 15% di e poblashon ku tin problema ku bista i e meta ta pa por yega na 25% i mas. Pa esaki mester di fondo pa por kubri e gastunan. E fondo nan ta sirbi pa hasi e Fundashon mas konosí den komunidat i asina yega na e klientenan ku Pro Bista ke alkansá. Ademas ku e fondo nan rekoudá, Pro Bista ta logra hasi mas ku e klientenan i bira tur dia di nobo mas profeshonal. Den e luna di Buzon, Fundashon Pro Bista ta organisá diferente aktividat pa rekoudá fondo” fundraising”. Un di e aktividatnan ku Pro Bista ta organisá ta Knock Out di Dominó. Esaki ta un evenemento kaminda ku team nan di dominó ta bin kompetí pa wak si nan por gana e klientenan di Fundashon Pro Bista. Lo bai tin 10 team ta kompetí e aña aki. E knock out ta dia 17 di ougùstùs.  E ta kuminsá 10 or di mainta pa 6 or di atardi, na Fundashon Pro Bista, Corieweg 16 E ambiente riba e dia aki lo ta tremendo. Lo bai tin bar i kushina bon surti. Fundashon Pro Bista ta invitá pueblo di Korsou, pa bini dia 17 di ougùstùs pa bo tambe disfrutá di e Knock Out tremendo aki. Lo bai tin mesa disponibel pa esnan ku ke pega pieda so tambe. Bo por yama na 737-9222 of mail na info@probista.com pa tuma mas informashon tokante e Knock Out di Dominó aki. Sigui krese ku nos!