A hasi grabashon pa programa di televishon di Ivo Niehe

WILLEMSTAD – Durante un seshon informativo anteriormente e siman aki na sentro di bario Brievengat profesor dr. Bob Pinedo komo presidente di Fundashon Prevenshon a splika ku for di komienso na 2010 nan a hasi mas ku 30 mil mamografia pa detekshon tempran i pa prevení morto kousá pa kanser na pechu. Pa siman e sentro di FP den Klipstraat na Otrobanda ta traha alrededor di 800 mamografia.

Den e aña di lustro aki tambe e tim di FP ta sigui duna informashon i saminá hende muhé riba señal pa kanser na pechu. Profesor Pinedo a enfatisá un biaha mas ku ora detektá algu tempran médikonan por skapa bida di e persona i den hopi kaso tambe evitá ku mester kita e pechu. Ta rekomendá hende muhé entre 45 i 75 aña pa laga saminá nan pechunan kada dos aña. Na FP no tin tempu di espera, por regla transporte i e trato ta relahá e persona, i e ta efisiente i profeshonal. Su relato a haña un dimenshon adishonal ora señora Imelda Statia a konta di su mes eksperensia ku a kondusí na amputashon di su pechu pasobra e tabata muchu leu kaba. Unda ku e ta e ta konta kon importante ta pa kada ken saminá su kurpa e mes i si tin algu bai dòkter di kas mesora. El a elogiá e trabou tantu di Fundashon Prevenshon komo di Fondo Prinsesa Wilhelmina. Pa su sorpresa na final di e seshon profesor Pinedo a entreg’é un plaka di apresio pa su kontribushon na e proseso di konsientisashon. Nan a anunsiá tambe ku Brievengat i besindario ta e bario kaminda mas tantu hende muhé a respondé na e apelashon pa bin laga saminá nan pechunan.

Ivo Niehe

Prof Pinedo a splika tambe ku bou di guia di drs Desiree Hooi ta hasiendo bon progreso den e investigashon entre 1000 hende muhé pa e viro di HPV ku por kousa kanser na boka di matris. Pronto e fundashon ta spera di por presentá resultado konkreto di e investigashon importante aki.

Miéntras ku e onkólogo mundialmente rekonosé na sentro di bario Brievengat tabata informando un grupo di hende muhé den su idioma materno kon por hasi lo máksimo pa prevení kanser, tabata graba partinan di e enkuentro. E grabashonnan aki ta forma parti di un potrèt grabá mas amplio ku e konosido presentadó Ivo Niehe di televishon Hulandes ta trahando di profesor Pinedo, ku ta hopi bon mirá na Hulanda pa su méritonan grandi pa kombatí kanser. Pa e programa a graba tambe na su kas, na e sentro di FP i algun imágen general di Kòrsou, e isla natal di profesor Pinedo. Na su debido tempu lo anunsiá ki dia ta transmití e programa di moda ku aki tambe por wak e.