Djarason atardi a tuma lugá na Sektor di Kultura i Deporte na Skalo e konferensiá di prensa organisá pa Fundashon Karnaval Banda Bou i Tim di Transishon kaminda nan a duna splikashon di Karnaval 2019 i e maneho nobo pa Karnaval 2020.

Señora Lisette Jansen, Presidente di Fundashon Karnaval Banda Bou a splika ku : E situashon ku apesar di hopi espektativa na aporte di spònsernan ku a primintí no tabata tei òf kompleto òf no a risibí nada mes di spònsernan ku a pone ku e organisashon a keda ku un saldo habri serka kreditor nan ku a duna nan servisio.

Tambe internamente tabatin situashon nan kaminda tur hende no tabata den e mesun direkshon ku a pone ku finalmente kosnan no a kana manera mester ta. Nos a traha riba un plan kon ta bai sanea e situashon aki,  di forma ku tur kreditor lo risibí nan montante i tambe krea asina un situashon sano pa ku aña 2020.

Semper nan a hunga karta habri pues ku no tabata tin nada di skonde i ku Sektor di Kultura semper tabata na altura di tur loke ku e fundashon tabata hasi i tur loke a keda atras ainda pa kumpli kuné. Nos lo no bai den publisidat ku detaye di montante di debe nan ku tin ni kreditornan, pero no ta e sumanan ku ta wòrdu menta riba kaya.

Sra. Lisette  ta gradisí na sosten risibí di miembronan di Direktiva, Sektor Kultura i Deporte,  tambe miembronan di Prensa, ku semper a sa di yama i puntra promé ku publiká algu i e sosten duna semper na e Fundashon di Banda Bou.

Struktura pa Karnaval 2020 

Señor Rignald Maduro ta un di e persona nan klave ku lo forma parti di e Tim di Transishon pa duna un man na struktura e Karnaval 2020 di Banda Bou.

Rignald Maduro, Clayton Mogen, Johny Isabella lo forma parti di e Tim i sosten tambe di Clint Gosepha, Rodney Aniseto, Erickson Vicario, Eugene Goedgedrag, ku sosten di un tim ku lo ehekutá tareanan pa yuda kordiná spesialmente gruponan pa e marcha nan. Tambe tin personanan ku a pone nan mes disponibel pero pa nan bin dilanti no ta importante pero e trabounan ku mester wòrdu hasi.

Tambe a tene un reunion ku sr. Henny Reinilla di AGKK ku a bai hopi bon, kaminda a keda akordá ku e gruponan di pariba ku kier partisipá den Marcha di Banda Bou mester registrá serka AGKK.

Señor Johnny Isabella ku tambe ta forma parti di e Tim pa Apertura dia 5 yanüari 2020 na Playa Kenepa di 12’or pa 6’or di atardi, Marcha di Skolnan dia 21 febrüari 2020, i tambe e Tim di sosten pa gruponan di Banda Bou pa dia 22 febrüari 2020 pa ku e Marcha di Banda Bou.

Pa Karnaval 2020,  lo NO bai tin elekshon di Reina, Prens i Pancho Hubenil i Adulto mirando ku esaki no ta un produkto ku Gobièrnu ta kumpra serka nos. A proponé un idea serka Fundashon JAG ku e posibilidat ku nan promé finalista por bira e embahadornan di Banda Bou, pero ainda no a risibí un kontesta. Pero loke sea e desishon di Fundashon JAG, esaki lo wòrdu respetá i lo bai na un Plan B.

Baluarte pa Karnaval Banda Bou 2020 lo ta nada mas ku sr. Rudwin (Win ) Mogen. Un persona ku a bin ta yuda ku Karnaval i e Marchanan ku no ta un trabou nada fásil pa ehersé.

Sra. Lizette Sambo – Velder a duna di konosé ku nan ta na altura di e situashon pa ku pagonan atrasá di e Fundashon, pero ku huntu ku Minister nan a yega na e desishon ku Karnaval di Banda Bou tei pa keda.

Simposio

Lo bai tin un simposio den luna di novèmber kaminda tur Stakeholdersnan ku tin di haber ku karnaval di Banda Bou lo wòrdu invitá pa deliberá i palabra kiko ta e mihó loke mester sosodé ku Marcha di Banda Bou sigui eksistí. Pa asina por tende e pueblo di Banda Bou kiko ta nan deseonan pa ku desaroyo i kontinuidat di Karnaval Banda Bou.

Lisette Jansen huntu ku Rignald Maduro na nòmber di tur e miembronan di Direktiva i Tim di Transishon a yama danki pa e sosten ku nan a bin ta risibí di Prensa i tambe di tur ku kier duna un man pa trese un Karnaval ku disiplina, kreatividat i na nivel i digno di loke tin pa invertí den e Karnaval 2020.