Djadumingu 3 desèmber 2017 Fundashon J.A.G. konhuntamente ku fundashon di Karnaval Band”Abou, tabatin su promé rueda di prensa kaminda el a duna informashon di e plannan ku e tin pa ku organisashon di Karnaval 2018. Tambe Fundashon J.A.G. a presentá su skema di e diferente aktividatnan ku tin den e periodo di karnaval 2018.
Un di e inovashonnan ku Fundashon J.A.G. a lansa ta ku aparte di tin un baluarte di Karnaval 2018 den persona di Sr. Orlando Cuales, e ta introdusí un PILÁ di Karnaval kual ta MCB bank. Esaki ta un rekonosementu ku Fundashon J.A.G. ta duna na instansia/o organisashonnan ku atraves di añanan a aportá i para manera un pilá engrandesiendo nos Karnaval.

Un otro inovashon ta un Curacao Carnival Village na apertura di e temporada di karnaval 2018. Despedida di parade di Tiner ta otro inovashon ku e pueblo di Kòrsou por spera na 2018. En koperashon ku Curacao Tourist Board Fundashon J.A.G. lo reintrodusí Kaya 9.

J.A.G  tin komo meta organisa karnaval, duna balor na hende ku ta é elemento prinsipal di nos  kultura, i tambe konsientisá pueblo di Korsou durante di e periodo aki. E aña aki Fundashon J.A.G. a skohe un tema ku tin di haber ku medio ambiente pa hasi esaki. E lema pa ku karnaval 2018 ta: “Pensa, Marcha i Gosa bèrdè”. E lema aki ta basá riba e konsepto di un medio-ambiente sano i duradero.