Willemstad: Ku e slogan “Nos Karnaval”, FDKK ta infatisá ku e karnaval di Kòrsou ta unu sumamente impaktante, importante i ku henter e komunidat di Kòrosu ta forma parti di e selebrashon aki. FDKK tin un periodo sumante kòrtiku, 2 luna, pa por organisá tur e aktividatnan konserní segun e mandato di Gobièrnu di Kòrsou. Pa ku esaki a buta enfasis riba e 5 pilanan manera: Apertura, Tumba Hubenil, Elekeshonnan, Marchanan di karnaval i klousura.
Ku e vishon pa den 5 aña hasi e organisashon di karnaval unu independiente i asina krese e produkto karnaval tantu lokal pero tambe internashonal, FDKK a tra un tim ku ta konsistí di personanan ku hopi eksperensia riba e tereno karnavalesko. E enfoke di FDKK 2023 ta pa tin un karnaval sumamente strukturá, kaminda ku kreatividat, ambiente, seguridat i responsibilidat di kontabilidat lo ta sentral. Riba termino largu nos lo konsentrá pa krese e produkto karnaval i asina aumentá nos mikro pero tambe makro ekonomia durante e periodo aki.
Despues di a reuní ku e diferente stakeholders, FDKK a stipulá su strategia pa ku karnaval 2023. Esaki lo ta unu ku enfoke spesial pa ku e gruponan di karnaval. Gruponan di karnaval ta sentral den henter e selebrashon di karnaval i nos mester manetené e kalidat di tantu gruponan hubenil i tiner pa asina tin relevo pa e gruponan di adulto. Maneho di marchanan, kontabilidat finasiero, uso di téknologia i seguridat públiko ta puntonan sentral, segun Sr. Harms ta splika.
FDKK ta konvensí ku Kòrsou lo konosé un Karnaval bunita. Mirando e presentashonnan di e diferente gruponan di karnaval no tin duda ku esaki lo ta e kaso.
Apertura di karnaval: 07 yanüari 2023
Un konsepto nobo kaminda mayoria Bandanan popular, gruponan di karnaval, turista, artistanan individual i e grupo grandi di fanátiko di karnaval lo partisipá.
Tumba Hubenil: 14 di yanüari 2023
Pa ku Tumba Hubenil FDKK a skohe pa enkargá dos hoben konosí ku a bin ta tra huntu i ku hopi éksito den Festival di Tumba, kual ta Sr. Heinrich “Rich Rich” Pieter i Axel Pikero, pa ta na enkargo ku nos Tumba Hubenil. Punto sentral di Tumba Hubenil lo partisipashon i no direktamente kompetensia. Involvimentu di e mayor lo ta sentral den henter e trayekto di e artista hóben aki.
Elekshon Reina, Rey, Prens i Pancho: 20,21,22 di yanüari 2023
Tambe Kòrsou lo tin su diferente eventonan di elekshon pa skohe nos Rei i Reina Tiner; Reina, Prens i Pancho Hubenil; Reina, Prens i Pancho Grandi. Sigi medionan di komunikashon pa mas informashon.
Karnaval di Banda Bou
Mas aleu a informá ku e aktividatnan di karnaval di Banda Bou lo tuma lugá na 2023 i ku e tim di Fundashon Karnaval Banda Bou ta den deliberashon i lo konvoká un rueda di prensa spesífiko pa splika kiko tur e plannan nobo lo ta pa ku karnaval di Banda Bou.
Marcha di Karnaval hubenil, tiner i adulto
FDKK a enfatisá ku un punto di suma importansia lo ta e maneho di e diferente marchanan. Nos ta strukturando henter e proseso di maneho di marcha pa asina yega na un marcha disipliná i ku ménos opstákulo posibel. Un marcha ku ta sali na tempu i ku ménos “buraku” posibel. Un marcha kaminda ku e partisipante no ta sinti ku ta kore nan ta kore enbes di jump. Esaki ta un proseso ku nos a inisiá huntu ku e diferente departamentunan manera KPC, brandweer, ambulans huntu ku AGKK i AMAK. Tur esakinan ta konta pa marcha di Kabai, Hubenil, Tiner i Adulto. Pa ku 2023 e ruta di karnaval lo ta meskos pero si mester tene na kuenta ku pa 2024 e ruta por kambia. Mas lihé ku ta posibel nos lo amplia riba esaki, Herman Harms a informá.
Wak kalendario di marcha pa e diferente fecha nan.
Klousura Karnaval 2023: 25 di febrüari 2023
Mas aleu FDKK a duna un bista di tur gastunan ku ta envolví ku organisashon di karnaval di Kòrsou. Ounke ku karnaval ta haña subsidio di Gobièrnu di Kòrsou, esaki no ta sufsiente pa karga tur gastu. Pa e motibu aki FDKK ta supliká e komunidat i spesialmente e fanátiko di karaval pa aportá ku e diferente aktividatnan di fundraising pa asina FDKK i tambe gruponan di karnaval por presentá den e marchanan. Den mes rosea Sr. Harms a supliká na komersio pa nan tambe aportá. Ounke ku e situashon finansiero i ekonómiko ta difísil, Kòrsou tin benefisio na e evento di Karnaval. Nos ekonomia ta fortalesé durante e periodo aki i nos mester karga e gastunan pa ku esaki huntu.
Ta un honor ku nos tin e oportunidat di organisá un magno evento manera nos karnaval di Kòrsou. FDKK ta determiná i ta kla pa Nos Karnaval 2023.
Felis Karnaval