Willemstad, – Union ta hasi forsa. Esei ta sigur na momentu ku bo trese dos mente huntu pa trese un mensahe dilanti ku ta bai impaktá Korsou pa superá tur situashon. Fundashon Alton Paas tin e previlegio di por traha huntu ku Levi Silvanie pa krea un mensahe di motivashon i inspirashon pa tur esnan ku ta pasando den momentunan difisil. Spesialmente personanan ku tin dwarslaesie òf famia di hendenan ku dwarslaesie. Tur dia nos ta mira aksidente i tur dia nos komo hende ta wòrdu enfrentá ku situashonnan ku nos no ta prepará pe. Pesei #Superando ta bai bira e mensahe ku Fundashon Alton Paas ta bai karga den preparashon pa e proyekto piloto di ehersisio intensivo lokal i tambe e programa di televishon produsí pa Fundashon Alton Paas i mas kolaboradornan. Esaki ku e simpel proposito pa konsientisá nos komunidat riba kiko ta dwarslaesie, personanan ku dwarslaesie i desaroyonan relashoná ku dwarslaesie dor ku nos ke superá e situashonnan di dwarslaesie. Pa e motibu ei e kolaborashon ku Levi Silvanie, Zoinx i Url Isenia pa krea e musika ku ta bai karga e mensahe aki rònt Kòrsou. Tur hende por kuminsá skucha e mensahe aki i prepará pa e otro fasetanan pa nos yega riba e dia ku e programa di televishon ta bai kuminsá na CBA plus Telecuracao.