WILLEMSTAD- yüni 2015; Dia 28 di yüni último a selebrá Dia di San Pedro, un dia riba kua ta konmemorá historia di San Pedro i su nifikashon pa humanidat. Tres aña pasá a organisá e promé selebrashon di Dia di San Pedro,  dediká na Sr. Marco Boelbaai, un persona ku ta sòru boluntariamente pa limpiesa di Playa Piskadó Westpunt. Na 2014 a dediká e selebrashon na Sr. Rignald Poulo, e persona ku a kuminsá ku e fiesta di San Pedro. E aña akí a honra un di e fundadónan di Banco di Caribe, Sr. Eddie de Kort, ku a duna sostén finansiero pa realisashon di e pir na Playa Piskadó na Westpunt 

Banco di Caribe ya pa algun aña a aportá na selebrashon di Dia di San Pedro i riba djadumingu dia 28 di yüni último esaki no tabata un eksepshon. “Nos ta masha orguyoso ku a dediká e dia aki na, Sr. Eddie de Kort. E tabata un persona klave den finansiamentu i konstrukshon di e pir na Playa Piskadó ku te awe ta e lugá kaminda piskadónan di Kòrsou i di Westpunt ta deskargá  loke nan a piska pa despues bende esaki pa gana nan pan di kada dia. Nos ta gradisí komunidat di Westpunt pa e rekonosementu bunita aki na Sr. Eddie de Kort”,esaki di akuerdo ku Sr. Fons Simon, CEO i General Managing Director di Banco di Caribe.

Banco di Caribe ta sumamente orguyoso di por a kumpli ku e deseo di e piskadónan na e pir di Westpunt. E selebrashon di Dia di San Pedro tabata tur afó; a kuminsá ku un Santu Sakrifisio di misa na e misa di Westpunt siguí pa diferente aktividat na playa piskadó. Durante e selebrashon un i tur a disfrutá di presentashon di Happy Youth in Jesus, animashon di dj Bradley i músika di e agrupashonnan di ERA Outéntiko i O’vega. Tambe tabata tin weganan di ántes i bendementu di kuminda.