WILLEMSTAD — For di promé ku Curaçao Clean Up a ser fundá, Corinne Senior-Van Hal huntu ku Josette Kölker-Boomgaart ya kaba tabata organisá un Fuikdag ‘cleanup afterparty’. Despues di Fuikdag fondo di laman ta kubrí ku bòter i bleki di serbes. E aña aki tambe e akshon tabata nesesario i esaki a tuma lugá riba 9 di yanüari. Un grupo di 50 boluntario, entre kual 25 sambuyadó, a bai man na obra pa limpia e area. Un total di 1160 kilo a ser limpiá, menos ku e añanan anterior

E grupo di boluntario a sali 9 or di mainta riba Pelikan Express ku tur aña ta yuda sostené e akshon di limpiesa na Fuikbaai. Riba e pagina di Curaçao Clean Up a hasi un yamada i diferente hende a reakshoná. CITRO tambe tabata presente pa sòru ku tur kos ta kana nèchi i sin problema. Skol di sambuya Curious2Dive a spònser diferente tanki di zürstòf i a hür sèt di sambuyá pa un preis redusí. Tambe e fundashon tabata kontentu ku Selikor a buta un container riba e playa kaminda tur persona por hinka nan shushi aden. Lokual tabata pekuliar ta ku hendenan tabata hinka nan shushi nèchi den saku pero tabata laga esaki riba e playa i no den e baki.

E deseo ta naturalmente ku un akshon di limpiesa lo no ta nesesario den futuro despues di Fuikdag. Nos tur por sigui gosa di Fuikdag si tur hende sòru pa despues di un dia ameno nan tira tur kos den e baki designa òf bai kuné kas pa tira afó na kas, nos por tene e area limpi,” segun Corinne Senior-Van Hal. Nos kier gradisí tur boluntario ku a duna un man pa limpia i laga e area bunita atras pa nos por sigui disfrutá di dje hinter aña bai.